ރާއްޖޭގެ ޞިއްޙީ ދާއިރާއަށް އައި ބޮޑު ކުރިއެރުމަކާއެކު، "ނެނޯ ނީޑަލް" ޓެކްނޮލޮޖީ ބޭނުންކޮށްގެން ހުޅުތަކުގެ އެތެރެ ބަލާ އަދި ފަރުވާ ދިނުމުގެ ޚާއްޞަ ސާޖަރީތައް އައިޖީއެމްއެޗް އަދި ދަރުމަވަންތަ ހޮސްޕިޓަލުގައި ފަށައިފިއެވެ. މިއީ ރާއްޖޭގައި މިފަދަ ޓެކްނޮލޮޖީއެއް ބޭނުންކޮށްގެން މިފަދަ އޮޕަރޭޝަންތަކެއް ކުރަން ފެށި ފުރަތަމަ ފަހަރެވެ.

މި އައު ޓެކްނޮލޮޖީއަކީ އިންޖެކްޝަން ކައްޓެއްހާ ހަނި، ލަނބާލެވޭ ކެމެރާއެއް ބޭނުންކޮށްގެން ވަރަށް ކުޑަ ލޯވަޅަކުން ކުރެވޭ އޮޕަރޭޝަނެކެވެ. މީގެ ސަބަބުން އެމްއާރްއައި (MRI) ހަދަން ނުޖެހި، ހުޅުތެރޭގައި ހުންނަ ކަށި އިތުރުވުމާއި، ކާޓިލޭޖް ހަލާކުވުން ފަދަ މައްސަލަތައް ސީދާ ލޮލުން ބަލާލައި ދެނެގަތުމަށް ބޮޑު ފަސޭހައެއް ލިބިގެންދެއެވެ.

Ad by Hajj Corporation

އައިޖީއެމްއެޗްގެ އޯތޮޕީޑިކްސް ޑިޕާޓްމެންޓުން ފާހަގަކުރި ގޮތުގައި، މިއީ ހާއްސަކޮށް ކުދި ކުދި ހުޅުތަކަށް ދެވޭ ފަރުވާގައި ލިބުނު ވަރަށް ބޮޑު ކުރިއެރުމެކެވެ. މި ސާޖަރީގެ އެންމެ ބޮޑު އެއް ފައިދާއަކީ ބަލިމީހާ ހޮސްޕިޓަލުގައި މަޑުކުރަންޖެހޭ ވަގުތު ކުޑަވެ، އަވަހަށް ބަލިން ފަސޭހަވުމަށް މަގުފަހިވުމެވެ.

މީގެ އިތުރުން، މިއީ "ޑޭކެއަރ" ސާޖަރީއެއްގެ ގޮތުގައި ކުރިއަށް ގެންދެވޭނެ ކަމެއް ކަމަށް ހޮސްޕިޓަލުން މަޢުލޫމާތު ދެއެވެ. މިކަމުގެ ސަބަބުން އެނެސްތީޝިއާ ދިނުމުގައާއި ސާޖަރީއަށްފަހު ބަލިމީހާއަށް އިހުސާސްކުރަންޖެހޭ ތަދު ކޮންޓްރޯލް ކުރުމުގައި ބޮޑެތި ފަސޭހަތަކެއް ލިބިގެންދާނެއެވެ.

އައިޖީއެމްއެޗުން ދަނީ ހުޅުގެ ފަރުވާގައި ޒަމާނީ ވަސީލަތްތައް އިތުރުކޮށް، ޚިދުމަތުގެ ފެންވަރު ރަނގަޅު ކުރަމުންނެވެ. މިފަދަ އައު ޓެކްނޮލޮޖީތައް ތަޢާރަފްވުމަކީ ބަލިމީހުންނަށް ލިބޭ ލުއިފަސޭހައެއްގެ އިތުރުން، އެ ހޮސްޕިޓަލުގައި ތަމްރީނުވަމުންދާ ޑޮކްޓަރުންނަށްވެސް އައު އުކުޅުތައް ދަސްކުރުމަށް ލިބޭނެ ރަނގަޅު ފުރުޞަތެއް ކަމަށް އެ ހޮސްޕިޓަލުން ވިދާޅުވިއެވެ.