ވެސްޓަން އޮސްޓްރޭލިއާގެ އައްސޭރިފަށުގައި މިޔަރެއް ހަމަލާދިނުމުގެ ސަބަބުން ޒުވާނަކު މިއަދު މަރުވެއްޖެއެވެ.

މިއަދު (6 ޖޫން 2026) ހިނގި މި ހާދިސާގައި މަރުވެފައިވަނީ އުމުރުން 35 އަހަރުގެ ފިރިހެނެކެވެ. އޭނާ މަރުވީ އާއިލާގެ މެންބަރުންނާއެކު މޫދަށް ގޮސް ބަޑިޖަހައިގެން މަސްހިފަން (ސްޕިއަރފިޝިންގ) އުޅެނިކޮށް، ގާތްގަނޑަކަށް 4.5 މީޓަރު (15 ފޫޓު) ބޮޑު މިޔަރެއް ހަމަލާދިނުމުގެ ސަބަބުންނެވެ.

Ad by Hajj Corporation

މި ހާދިސާ ހިނގާފައިވަނީ ވެސްޓަން އޮސްޓްރޭލިއާގެ ދެކުނު އައްސޭރީގައި އޮންނަ އަލްބަނީއާ 13 ކިލޯމީޓަރު ދުރުގައި އޮންނަ "މައިކަލްމަސް އައިލެންޑް" ކައިރީގައެވެ. ހާދިސާ ހިނގީ އެ ގައުމުގެ ގަޑިން މިއަދު ހެނދުނު 11:25 ހާއިރުއެވެ.

މަންޒަރު ދުށް ފަރާތްތަކުން ބުނި ގޮތުގައި، މިޔަރު ހަމަލާދިނުމާއެކު އެ ސަރަހައްދުގައި ތިބި މީހުން ވަނީ ވަގުތުން އޭނާ ލޯބަކަށް އަރުވައިގެން "އަލްބަނީ ވޯޓަރފްރަންޓް މެރީނާ" އަށް ގެންގޮސްފައެވެ. އެތަނަށް އެމްބިއުލާންސް ގޮސް، ޕެރަމެޑިކުން ގަޑިއިރަކަށް ވުރެ ގިނަ އިރުވަންދެން ސީ.ޕީ.އާރް ދީގެން އޭނާ ސަލާމަތްކުރުމަށް މަސައްކަތް ކުރި ނަމަވެސް، ލިބިފައިވާ އަނިޔާތަކުގެ ސަބަބުން އޭނާ ވަނީ މަރުވެފައެވެ.

މިއީ ފާއިތުވި ކުޑަ ދުވަސްކޮޅެއްގެ ތެރޭގައި ވެސްޓަން އޮސްޓްރޭލިއާގައި މިޔަރު ހަމަލާދީ މީހަކު މަރުވި ދެވަނަ ހާދިސާއެވެ. މެއި މަހުގެ 16 ވަނަ ދުވަހު ރޮޓްނެސްޓް އައިލެންޑް ކައިރިންވެސް 38 އަހަރުގެ މީހަކު ވަނީ މިޔަރު ހަމަލާއެއްގައި މަރުވެފައެވެ. އަދި 2026 ވަނަ އަހަރު ފެށުނު ފަހުން އޮސްޓްރޭލިއާގައި މިޔަރު ހަމަލާދިނުމުގެ ހާދިސާތައް ވަނީ އިތުރުވެފައެވެ.

ވެސްޓަން އޮސްޓްރޭލިއާގެ ދެކުނު އައްސޭރިއަކީ "ގްރޭޓް ވައިޓް" މިޔަރު ފަދަ ނުރައްކާތެރި ބާވަތްތަކުގެ މިޔަރު ގިނަ ސަރަހައްދެކެވެ. ވަކިން ހާއްސަކޮށް، ބަޑިޖަހައިގެން މަސްހިފާއިރު މަހުން އޮހޭ ލޭގެ ސަބަބުން މިޔަރު އެ ސަރަހައްދަށް ދަމައިގަތުމުގެ ފުރުސަތު ބޮޑުވާކަމަށް ތަޖުރިބާކާރުން ބުނެއެވެ.

މި ހާދިސާއާ ގުޅިގެން ކަމާބެހޭ އިދާރާތަކުން ވަނީ އެ ސަރަހައްދުގެ މޫދަށް އެރޭ ފަރާތްތަކުން ސަމާލުވުމަށް އިލްތިމާސްކޮށްފައެވެ. އަދި ހަމަލާދިނީ ކޮން ބާވަތެއްގެ މިޔަރެއްތޯ ބެލުމަށް އިތުރު ތަހުގީގުތައް މިހާރު ދަނީ ކުރަމުންނެވެ.