ދިވެހިރާއްޖެއަށް އަލަށް ކަނޑައެޅުއްވި ތިން ގައުމެއްގެ ސަފީރުން، އެ ބޭފުޅުންގެ ސަފީރުކަމުގެ ފަތްކޮޅު ރައީސުލްޖުމްހޫރިއްޔާ ޑރ މުޙައްމަދު މުޢިއްޒުއަށް މިއަދު އަރުވައިފިއެވެ.

މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި ބޭއްވެވި މި ރަސްމިއްޔާތުގައި، ސަފީރުކަމުގެ ފަތްކޮޅު އަރުވާފައިވަނީ ރިޕަބްލިކް އޮފް ފިލިޕީންސް، ކިންގްޑަމް އޮފް ނެދަލޭންޑްސް އަދި ފަރަންސޭސިވިލާތުން ރާއްޖެއަށް ކަނޑައެޅުއްވި އައު ސަފީރުންނެވެ.
އެގޮތުން ފަތްކޮޅު އެރުވި ސަފީރުންނަކީ:
1. ފިލިޕީންސް ސަރުކާރުން ރާއްޖެއަށް ކަނޑައެޅުއްވި އައު ސަފީރު، ހަރ އެކްސެލެންސީ ނީނާ ޕީ. ކައިންޖްލެޓް.
2. ނެދަލޭންޑްސް ސަރުކާރުން ރާއްޖެއަށް ކަނޑައެޅުއްވި އައު ސަފީރު، ހިޒް އެކްސަލަންސީ ވެއިބެ ޖޭކޮބް ޑި ބޮއަރ.
3. ފަރަންސޭސިވިލާތުގެ ސަރުކާރުން ރާއްޖެއަށް ކަނޑައެޅުއްވި އައު ނޮން-ރެޒިޑެންޓް ސަފީރު، ހިޒް އެކްސަލެންސީ ރެމީ ލޮބޭޚް.

މި ރަސްމިއްޔާތަށް ސަފީރުން ވަޑައިގެންނެވީ ހަތްކޮޅުގައި، ރަސްމީ އިއްޒަތުގައެވެ. ސަފީރުންނަށް މަރުޙަބާ ދެންނެވުމުގެ ގޮތުން މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) ގެ ބެރު ދުންމާރި ތާޅަފިލީގައި، ހެވިކަމުގެ ލަޝްކަރާއެކު ރަސްމީ ހިނގާލުމެއް ބާއްވާފައިވެއެވެ.

Ad by Hajj Corporation

ފަތްކޮޅު އެރުވުމުގެ ރަސްމިއްޔާތަށްފަހު، ރައީސުލްޖުމްހޫރިއްޔާ ވަނީ ވަކިވަކިން ސަފީރުންނާ ބައްދަލުކުރައްވައި، އެ ބޭފުޅުން ސަފީރުކަމާ ހަވާލުވެވަޑައިގަތުމާ ގުޅިގެން ތަހުނިޔާ ވިދާޅުވެ، ރާއްޖެއަށް ވަޑައިގެންނެވިކަމަށްޓަކައި މަރުޙަބާ ދަންނަވާފައެވެ.

މި ބައްދަލުކުރެއްވުންތަކުގައި، ރާއްޖެއާއި އެ ގައުމުތަކާ ދެމެދު އޮތް ގުޅުން އިތުރަށް ބަދަހިކުރެވިދާނެ ދާއިރާތަކާ ގުޅޭގޮތުން ފުޅާ ދާއިރާއެއްގައި މަޝްވަރާކުރެވުނެވެ. ސަފީރުންގެ ވާހަކަފުޅުގައި، ރާއްޖޭގައި މަސައްކަތްކުރާ އެ ގައުމުތަކުގެ ރައްޔިތުންނަށް ދިވެހި ސަރުކާރާއި ރައްޔިތުން ފޯރުކޮށްދެމުންދާ މެހުމާންދާރީއަށް ޝުކުރު އަދާކުރެއްވިއެވެ.

މީގެ އިތުރުން، ދެ ގައުމުގެ ދެމެދުގައި އޮތް ރަޙުމަތްތެރި ގުޅުން މިހާރަށްވުރެ ބަދަހިކޮށް، ދެ ފަރާތުގެ މަސްލަހަތު ހިއްސާކުރާ ދާއިރާތަކުން ގުޅިގެން މަސައްކަތްކުރުމުގެ އަޒުމް އޮތްކަން އައު ސަފީރުންނާއި ރައީސުލްޖުމްހޫރިއްޔާ ވަނީ ކަށަވަރުކޮށްދެއްވާފައެވެ.