ބައިނަލްއަޤުވާމީ ގޮތުން ފާހަގަކުރާ ލޭ ހަދިޔާކުރާ މީހުންގެ ދުވަހުގެ މުނާސަބަތުގައި، އަމިއްލަ އިސްނެގުމަށް އެއްވެސް އެދުމެއްނެތި ލޭ ހަދިޔާކުރާ ފަރާތްތަކުގެ އަގު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަޒަންކުރައްވައިފިއެވެ.

ދުނިޔޭގެ ލޭ ހަދިޔާކުރާ މީހުންގެ ދުވަހުގެ މުނާސަބަތުގައި ސޯޝަލް މީޑިއާގައި ހިއްސާ ކުރެއްވި މެސެޖެއްގައި ރައީސް ވިދާޅުވީ، އަމިއްލައަށް އެދިގެން ލޭ ހަދިޔާކުރާ މީހުންގެ ބައިވެރިވުން ފާހަގަކުރަން ޖެހޭ ކަމަށެވެ. އަދި އެއީ ކުއްލި ނުރައްކަލުގެ ހާލަތްތަކުގައި ފަރުވާ ބޭނުންވާ ބަލިމީހުންގެ ފުރާނަ ސަލާމަތްކުރުމަށް އެންމެ ބޭނުންޖެހޭ ވަގުތު ލިބިގެންދާ މުހިންމު އެހީތެރިކަމެއް ކަމަށް ރައީސް ވިދާޅުވިއެވެ.

Ad by Hajj Corporation

ސައިންސާއި ޓެކްނޮލޮޖީ އަދި ބޭސްވެރިކަމުގެ ދާއިރާއިން ދުނިޔެ ކިތަންމެ ކުރިއަރާފައިވީ ނަމަވެސް، ލެޔަކީ އޭގެ ބަދަލުގައި އެހެން އެއްޗެއް ބޭނުންކުރެވޭނެ އެއްޗެއް ނޫންކަން ރައީސް ފާހަގަކުރެއްވިއެވެ. އެހެންކަމުން، އާންމު ސިއްހަތު ރައްކާތެރިކުރުމަށާއި، ސިއްހީ ހިދުމަތްތައް ހަރުދަނާކަމާއެކު ފޯރުކޮށްދިނުމަށާއި، ގައުމީ ފެންވަރުގައި ކުރިމަތިވާ ކުއްލި ހާލަތްތަކަށް ތައްޔާރުވެފައި އޮތުމަށްޓަކައި، އަމިއްލަ އިސްނެގުމުގައި ލޭ ހަދިޔާކުރުން އިތުރުކުރުމަކީ ކޮންމެހެން ބޭނުންތެރި ކަމެއް ކަމަށް އެމަނިކުފާނު ވިދާޅުވިއެވެ.

ރާއްޖެއަކީ ޖިއޮގްރަފީގޮތުން ރަށްތައް ވަކިވަކިން އުފެދިފައިވާ ގައުމަކަށް ވުމާއެކު، ސިއްހީ ކުއްލި ހާލަތްތަކުގައި ވަގުތުން ވަގުތަށް ލޭ ލިބެން ހުރުމަކީ އިންސާނެއްގެ ފުރާނަ ސަލާމަތްކުރުމުގައި އެންމެ މުހިންމު ރޯލު ކުޅޭނެ ކަންތައްކަން ރައީސްގެ މެސެޖުގައި ފާހަގަކުރެއްވިއެވެ.

ރައީސް މުޢިއްޒު އިތުރަށް ވިދާޅުވީ، ލޭ ހަދިޔާކުރުމުގެ މުހިންމުކަމާ މެދު މުޖުތަމައު ހޭލުންތެރިކުރުވުމަށާއި، އަމިއްލައަށް އިސްނަގައިގެން ލޭ ހަދިޔާކުރާ ސަގާފަތެއް ގާއިމުކުރުމަށް މި ސަރުކާރުން އަބަދުވެސް މަސައްކަތް ކުރާނެ ކަމަށެވެ. އަދި އެންމެންގެ ސިއްހަތާއި ދުޅަހެޔޮކަން ރައްކާތެރިކުރުމުގައި، އެކަކު އަނެކަކަށް އެހީތެރިވުމުގެ ރޫހާއި، ބައިވެރިވުމުގެ ސަގާފަތެއް މުޖުތަމައުގައި ވަރުގަދަކުރުމަށް މި ސަރުކާރުން ބާރުއަޅާނެކަމުގެ ޔަގީންކަން ވެސް ރައީސުލްޖުމްހޫރިއްޔާ ވަނީ ދެއްވާފައެވެ.

ކޮންމެ އަހަރެއްގެވެސް ޖޫން މަހުގެ 14 ވަނަ ދުވަހަކީ ބައިނަލްއަޤުވާމީ ގޮތުން ފާހަގަކުރާ ލޭ ހަދިޔާކުރާ މީހުންގެ ދުވަހެވެ. 2004 ވަނަ އަހަރުން ފެށިގެން ފާހަގަކުރަމުން އަންނަ މި ދުވަހުގެ މިއަހަރުގެ ޝިއާރަކީ "އިންސާނިއްޔަތުގެ އެންމެ ތިއްކެއް. ލޭ ހަދިޔާކުރޭ. ފުރާނަ ސަލާމަތްކުރޭ" މިއެވެ. މި ދުވަހުގެ މައިގަނޑު މަގުސަދަކީ އެއްވެސް އަގަކާ ނުލައި ހިލޭސާބަހަށް ލޭ ހަދިޔާކުރާ މީހުންނަށް ޝުކުރު އަދާކުރުމާއި، ރައްކާތެރި ލޭ މުޖުތަމައުގައި އިތުރުކުރުމަށް ހޭލުންތެރިކަން އުފެއްދުމެވެ.