ކޮންމެ ލޭ ހަދިޔާކުރުމެއްގެ ފަހަތުގައިވަނީ ހަމްދަރުދީއާއި އިންސާނިއްޔަތުކަމުގެ ފުން ވާހަކައެއް ކަމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވިދާޅުވެއްޖެއެވެ.

އެކަމަނާ މިހެން ވިދާޅުވީ ދުނިޔޭގެ ލޭ ހަދިޔާ ކުރާ މީހުންގެ ދުވަހާ ގުޅުވައިގެން ސޯޝަލް މީޑިއާގައި ހިއްސާކުރެއްވި މެސެޖެއްގައެވެ.

Ad by Hajj Corporation

ރައީސުލްޖުމްހޫރިއްޔާގެ އަނބިކަނބަލުން ވިދާޅުވީ  ލޭ ހަދިޔާކުރާ ފަރާތްތަކުން ކުރާ މިފަދަ ނަމޫނާ މަސައްކަތްތަކަކީ، ދިރިއުޅުމުގެ އެންމެ އުނދަގޫ އަދި ނާޒުކު ދަނޑިވަޅުތަކުގައި ތިބޭ ބަލިމީހުންނާއި އެމީހުންގެ އާއިލާތަކަށް އާ އުންމީދެއް ގެނެސްދޭ ކަމެއް ކަމަށެވެ.

"ކޮންމެ ލޭ ހަދިޔާކުރުމެއްގެ ފަހަތުގައިވަނީ ހަމްދަރުދީއާއި އިންސާނިއްޔަތުކަމުގެ ފުން ވާހަކައެއް،" ފަސްޓް ލޭޑީގެ މެސެޖުގައި ފާހަގަކުރެއްވިއެވެ.

އެކަމަނާ އިތުރަށް ވިދާޅުވީ ފުރާނައެއް ސަލާމަތްކުރުމަކީ އަބަދު ބޮޑެތި އަދި ބިޔަ ކަންތައްތަކެއް ކުރަންޖެހޭ ކަމެއް ނޫން ކަމަށާއި، ބައެއް ފަހަރު ކުޑަކުޑަ އޯގާތެރި އަމަލަކުންވެސް މީހެއްގެ ދިރިއުޅުމަށް ބޮޑު ބަދަލެއް ގެނެވިދާނެ ކަމަށެވެ. އަދި ވަކި މުނާސަބަތަކަށް ބެލުމެއް ނެތި، އަމިއްލަ އިސްނެގުމުގެ މަތިން ގަވާއިދުން ލޭ ހަދިޔާކުރުމުގެ މުހިންމުކަމާ މެދު ހޭލުންތެރިކަން އިތުރުކުރުމަކީ އެންމެންގެ ޒިންމާއެއްގެ ގޮތުގައި ދެމެހެއްޓުމަށްވެސް އެކަމަނާ ވަނީ ގޮވާލައްވާފައެވެ.

ކޮންމެ އަހަރެއްގެވެސް ޖޫން މަހުގެ 14 ވަނަ ދުވަސް ފާހަގަކުރަނީ ދުނިޔޭގެ ލޭ ހަދިޔާކުރާ މީހުންގެ ދުވަހުގެ ގޮތުގައެވެ. މި ދުވަހުގެ މައިގަނޑު މަގުސަދަކީ ރައްކާތެރި ލެޔާއި ލޭގެ ބާވަތްތަކުގެ މުހިންމުކަމަށް ހޭލުންތެރިކަން ބޮޑުކުރުމާއި، ހިލޭސާބަހަށް ލޭ ހަދިޔާކުރާ ފަރާތްތަކުގެ އަގުވަޒަންކުރުމެވެ.