ކުރީގެ ތިމާވެށްޓާއި ބެހޭ ވުޒާރާގެ ވަޒީރު ތޯރިގް އިބްރާހިމް ޔުނައިޓެޑް އަރަބް އެމިރޭޓްސް (ޔޫއޭއީ) އަށް ކަނޑައަޅުއްވާ ސަފީރަކަށް އަދި ކުރީގެ ސިޓީސް މިނިސްޓަރު އާދަމް ޝަރީފް ގަތަރަށް ކަނޑައަޅާ ސަފީރަކަށް އައްޔަންކުރަން ރައްޔިތުންގެ މަޖިލީހުގެ މިއަދުގެ ޖަލްސާގައި ރުހުން ދީފިއެވެ.

މި ދެ ބޭފުޅުން ސަފީރުކަމަށް އައްޔަން ކުރެއްވުމަށް މަޖިލީހަށް ހުށަހަޅުއްވާފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ. މަޖިލީހުގެ މިއަދުގެ ވޯޓުގައި ތޯރިގަށް ރުހުން ދޭން 57 މެންބަރުން ވޯޓު ދެއްވިއެވެ. އާދަމް ޝަރީފަށް ވެސް 57 މެންބަރުން ވޯޓު ދެއްވިއެވެ.

Ad by Hajj Corporation

މި ދެ ބޭފުޅުންނަށް ރުހުންދޭން މަޖިލީހުން ފާސްކުރީ ހާރިޖީ ގުޅުންތަކުގެ ކޮމިޓީންވެސް ދެ ބޭފުޅުންނަށް ރުހުންދޭން ފެންނަކަމަށް ނިންމުމާ ގުޅިގެންނެވެ. ހާރިޖީ ގުޅުންތަކުގެ ކޮމިޓީން ދެ ބޭފުޅުންނަށް ރުހުން ދޭން ނިންމީ ތަޢުލީމީ ގޮތުންނާއި، ތަޖުރިބާގެ ގޮތުން ބަލާއިރު ވަރަށް ގާބިލު ދެ ބޭފުޅުންކަމަށްވާތީއެވެ. އެހެންވެ، އިތުރު އިންޓަވިއުއަކާ ނުލައި ދެ ބޭފުޅުންނަށް ރުހުން ދިނުމަށް ފާސްކުރިއެވެ.

ތޯރިގް އިބްރާހީމަކީ، މި ސަރުކާރުގެ މޫސުމީ ބަދަލުތަކާއި ތިމާވެއްޓާ ހަކަތައާ ބެހޭ ވަޒީރުކަން ކުރައްވާފައިވާ ބޭފުޅެކެވެ. އަދި އާދަމް ޝަރީފް އުމަރަކީ، މި ސަރުކާރުގައި ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވަޒީރުކަން ކުރައްވާފައިވާ ބޭފުޅެކެވެ.