ވޯލްޑް ކަޕްގެ ތާރީޚުގައި މިސްރުން ހޯދި ފުރަތަމަ މޮޅު، ނިއުޒީލެންޑް އަތުން 3-1 އިން މޮޅުވެގެން އެގައުމުން ކަށަވަރުކޮށްފިއެވެ. ވެންކޫވަރުގެ ބީސީ ޕްލޭސްގައި ކުޅުނު މި މެޗުގައި މިސްރުގެ ކެޕްޓަން މުހައްމަދު ސަލާހު ވަނީ ލަނޑެއް ޖަހައި އިތުރު ލަނޑެއް ޖެހުމަށް އެހީތެރިވެދީފައެވެ. މި މޮޅާއެކު މިސްރު މިވަގުތު އޮތީ ގްރޫޕް ޖީގެ އެއްވަނައިގައެވެ. މިއީ ވޯލްޑްކަޕްގެ ތާރީޚުގައި މިސްރު މިހާތަނަށް ކުޅުނު 4 ވޯލްޑްކަޕްގައިވެސް އެޓީމު މޮޅުވި ފުރަތަމަ މެޗެވެ.

މެޗުގެ ކުރީކޮޅު ނިއުޒީލެންޑުން ވަނީ ލަނޑެއް ޖަހައި ލީޑު ނަގާފައެވެ. މެޗުގެ 15 ވަނަ މިނެޓުގައި ޓިމް ޕޭން ނެގި ކޯނަރަކުން މި ލަނޑު އެގައުމަށް ކާމިޔާބުކޮށްދިނީ ފިން ސާމަން އެވެ. ނަމަވެސް މިސްރުން ވަނީ ހިތްވަރު ދޫނުކޮށް މެޗުގެ ކޮންޓްރޯލް ހޯދާފައެވެ. ފުރަތަމަ ހާފުގައި އިމާމް އާޝޫރާއި ސަލާހަށް ލަނޑު ޖަހާނެ ރަނގަޅު ފުރުސަތުތަކެއް ލިބި ބޭކާރުވެފައިވެއެވެ.

Ad by Hajj Corporation

މިސްރުން މެޗުގެ ނަތީޖާ ހަމަހަމަކުރީ 58 ވަނަ މިނެޓުގައެވެ. މުސްތަފާ ޒީކޯ ބޮލުން ފޮނުވާލި ބާރު ހަމަލާ ނިއުޒީލެންޑްގެ ކީޕަރު މެކްސް ކްރޮކޯމްބް އަތުގައި ޖެހިފައި ވަނީ ގޯލުގެ ތެރެއަށް ވަދެފައެވެ. އޭގެ ކުޑަވަގުތުކޮޅެއް ފަހުން، ސަލާހު ވަނީ ޒީކޯއާ އެކު އުފެއްދި ކައުންޓަރ އެޓޭކެއްގައި ހިތްގައިމު ލަނޑެއް ޖަހައި މިސްރަށް ފުރަތަމަ ފަހަރަށް ލީޑު ހޯދައިދީފައެވެ.

މެޗުގެ 82 ވަނަ މިނެޓުގައި މިސްރުގެ ތިންވަނަ ލަނޑު ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ޓްރެޒެގޭއެވެ. މިއީ ސަލާހު ނެގި ކޯނަރަކުން އޭނާ ކާމިޔާބުކުރި ލަނޑެކެވެ. މިއީ ވޯލްޑް ކަޕް މެޗެއްގައި މިސްރުން ތިން ލަނޑު ޖެހި ފުރަތަމަ ފަހަރެވެ. އަދި ޓްރެޒެގޭ ވެފައިވަނީ ވޯލްޑް ކަޕެއްގައި ބަދަލު ކުޅުންތެރިއެއްގެ ގޮތުގައި އެރި މިސްރުގެ ފުރަތަމަ ލަނޑު ޖެހި ކުޅުންތެރިޔާއަށެވެ.

މި މެޗުގައި ދެއްކި މޮޅު ކުޅުމާއެކު ސަލާހު ވަނީ ގިނަ ރެކޯޑުތަކެއް މުގުރާލާފައެވެ. އޭނާ ވަނީ ވޯލްޑް ކަޕްގެ ދެ މުބާރާތެއްގައި ލަނޑު ޖެހި މިސްރުގެ ފުރަތަމަ ކުޅުންތެރިޔާގެ ޝަރަފު ހޯދާފައެވެ. އަދި ޖުމްލަ ތިން ލަނޑާއެކު އޭނާ އަކީ މިހާރު ވޯލްޑް ކަޕްގައި މިސްރަށް އެންމެ ގިނަ ލަނޑު ޖަހައިދިން ކުޅުންތެރިޔާއެވެ.

ގްރޫޕްގެ ފަހު މެޗުގައި އީރާނާ ދެކޮޅަށް ކުޅޭ މެޗުން އެއްވަރުވިޔަސް މިސްރަށް ދެވަނަ ބުރުގެ ޖާގައެއް ކަށަވަރުވާނެއެވެ. އަނެއްކޮޅުން ނިއުޒީލެންޑަށް ވެސް އަދި ފުރުސަތު އެއްކޮށް ނުގެއްލެއެވެ. ފަހު މެޗުގައި ބެލްޖިއަމް އަތުން މޮޅުވެއްޖެނަމަ އެގައުމަށް ވެސް ނޮކައުޓް ބުރަށް ދިއުމުގެ ފުރުސަތު އެބައޮތެވެ.