މާލޭގައި ހުންނަ މަސްޖިދުލް ފުރުޤާން މިސްކިތުގެ ކުޑަދޮރަކަށް ބަޔަކު ގެއްލުންދީ، އެ ދޮރުގެ ބިއްލޫރިގަނޑު ތަޅައިލައިފިއެވެ.

މާލެ ސިޓީ ކައުންސިލުން ބުނީ ރޭގެ ވަގުތެއްގައި ހިނގި މި ހާދިސާގައި މިސްކިތަށް ލިބިފައިވާ ގެއްލުންތައް ފުލުހުންނަށް ރިޕޯޓްކޮށްފައިވާ ކަމަށެވެ. މިސްކިތުގެ ބިއްލޫރިގަނޑު ތަޅައިލައިފައިވާ ފޮޓޯތައް މިހާރު ދަނީ ސޯޝަލް މީޑިއާގައި ވެސް ދައުރުވަމުންނެވެ.

Ad by Hajj Corporation

މި ކަމާ ގުޅިގެން މާލެ ސިޓީގެ މޭޔަރ އާދަމް ޢާޒިމް މި އަމަލު ކުށްވެރިކުރައްވައި ވިދާޅުވީ، އިސްލާމްދީނުގައި ނުހަނު ބޮޑަށް ޙުރުމަތްތެރިކޮށް ހިތުމަށް އަންގަވައިފައިވާ މިސްކިތްތަކަށް މި ފަދަ ގެއްލުންތައްދޭ ފަރާތްތައް ހޯދައި، އެ ފަރާތްތަކަށް ޙައްޤު އަދަބު ދިނުމަށް ފުލުހުންނަށް ގޮވައިލައްވާ ކަމަށެވެ.

މޭޔަރ ޢާޒިމް އިތުރަށް ފާހަގަކުރެއްވި ގޮތުގައި މާލެ ސިޓީގެ މިސްކިތްތަކަކީ އެންމެހައި ރައްޔިތުންގެ އިޙުތިރާމާއި ރައްކާތެރިކަން ލިބެންޖެހޭ މުގައްދަސް ތަންތަނެވެ. އަދި މި ފަދަ ނާތަހުޒީބު ކަންކަމަކީ މުޖުތަމަޢުގެ ތެރޭގައި އެއްވެސް ހާލެއްގައި ބަލައިގަނެވޭނެ ކަންކަމެއް ނޫންކަމަށް ވެސް އެމަނިކުފާނު ވިދާޅުވިއެވެ.