މާލޭގެ ޕާކުތައް ހުޅުވާފައި ހުންނަ ވަގުތު ދަންވަރު 12:00 އާ ހަމައަށް އިތުރުކުރުމަށް މާލޭ ސިޓީ ކައުންސިލުން މިއަދު ނިންމައިފިއެވެ.

މިގޮތަށް ނިންމެވީ މިއަދު ބޭއްވި އެ ކައުންސިލުގެ އާންމު ބައްދަލުވުމުގައި ބައިވެރިވި މެންބަރުންގެ އިއްތިފާގުންނެވެ.

Ad by Hajj Corporation

މި ބައްދަލުވުމުގައި ޕާކުތައް ބަންދުކުރާ ގަޑި އުވާލުމަށް ފުރަތަމަ ހުށަހެޅުއްވީ މާފަންނު އުތުރު ދާއިރާގެ ކައުންސިލަރު ހުސައިން ފުރުޝާންއެވެ. އޭނާގެ ހުށަހެޅުއްވުމުގައި ފާހަގަކުރެއްވި ގޮތުގައި، ލޮނުޒިޔާރަތް ޕާކު ފަދަ ތަންތަނުގައި އެކަށީގެންވާ ސެކިއުރިޓީ އިންތިޒާމުތައް މިހާރުވެސް ގާއިމުކުރެވިފައިވެއެވެ.

އަދި ސަލާމަތީ ކަންކަން އިތުރަށް ވަރުގަދަކުރުމުގެ ގޮތުން ސީސީޓީވީ ކެމެރާ ހަރުކޮށް، ފުލުހުންގެ އެހީތެރިކަމާއެކު އެ ސަރަހައްދުތައް މޮނިޓަރުކުރެވޭނެ އިންތިޒާމު ހަމަޖެއްސުމަށްވެސް އޭނާ ލަފާދެއްވިއެވެ.

ނަމަވެސް، މާފަންނު ދެކުނު ދާއިރާގެ ކައުންސިލަރު އިބްރާހީމް ލަބާން ޝަރީފް ހުށަހެޅުއްވީ ޕާކުތައް 24 ގަޑިއިރު ހުޅުވާފައި ބެހެއްޓުމުގެ ބަދަލުގައި، ބަންދުކުރާ ގަޑި ދަންވަރު 12:00 އަށް ބަދަލުކުރުމަށެވެ. ކައުންސިލަރުން މިގޮތަށް ހުށަހެޅުއްވި މައިގަނޑު ސަބަބަކީ، މުޅި ރޭގަނޑު ޕާކުތައް ހުޅުވާފައި ބެހެއްޓުމަކީ ކުށްކުރުމަށް މަގުފަހިވެދާނެ ކަމެއް ކަމަށް ފެންނާތީއެވެ.

މި މަޝްވަރާތަކަށްފަހު ކައުންސިލުން ނިންމެވީ، މާލޭގެ ހުރިހާ ޕާކުތަކެއް ކޮންމެ ދުވަހެއްގެ ފަތިހު 05:30 އިން ފެށިގެން ދަންވަރު 12:00 އާ ހަމައަށް ހުޅުވާފައި ބެހެއްޓުމަށެވެ.