މަރާޓީ ފިލްމު 'ދިއޯލް ބޭންޑް 2' ބޮކްސް އޮފީހުގައި ބޮޑު ކާމިޔާބީއެއް ހޯދަމުން އަންނައިރު، މި ފިލްމު ސިނަމާތަކަށް ގެނައުމުގައި ބޮލީވުޑްގެ ސުޕަރސްޓާރު ޝާހްރުކް ޚާން މުހިންމު ދައުރެއް އަދާކޮށްފައިވާކަން ހާމަވެއްޖެއެވެ.

ގާތްގަނޑަކަށް 8 އާއި 10 ކްރޯޑް ރުޕީސްގެ ބަޖެޓަކުން އުފެއްދި މި ފިލްމު މިހާތަނަށް ވަނީ 80 ކްރޯޑަށް ވުރެ ގިނަ ރުޕީސްގެ އާމްދަނީއެއް ހޯދާފައެވެ.

Ad by Hajj Corporation

ފިލްމުގެ ޑައިރެކްޓަރު ޕްރަވީން ތަރްޑޭ ހާމަކުރި ގޮތުގައި، ފިލްމު ރިލީޒްކުރުމުގެ ކުރިން ކުރިމަތިވި މާލީ ދަތިތަކެއްގައި ޝާހްރުކް ޚާން ވަނީ 42 ލައްކަ އާއި 45 ލައްކަ ރުޕީސްއާ ދެމެދުގެ ބިލެއް މާފުކޮށްދީފައެވެ. މި އެހީތެރިކަން ފޯރުކޮށްދީފައިވަނީ ފިލްމު ސިނަމާތަކުގައި ދެއްކުމަށް ބޭނުންވާ ޑިޖިޓަލް ސިނަމާ ޕެކޭޖް (ޑީސީޕީ) ތައްޔާރުކުރުމަށް ޝާހްރުކްގެ ރެޑް ޗިލީސް އެންޓަޓެއިންމަންޓުން ކުރި މަސައްކަތަށެވެ.

ތަރްޑޭ ބުނި ގޮތުގައި، ޑީސީޕީ ތައްޔާރުކުރުމަށް އެމީހުން ބަޖެޓުކުރީ 12 ލައްކަ ރުޕީސް ކަމަށްވީ ނަމަވެސް، މަސައްކަތް ނިމުނުއިރު ބިލު ވަނީ 42 ލައްކައަށް އަރާފައެވެ.

 "އަހަރެމެންގެ އަތުގައި އެވަރުގެ ފައިސާއެއް ނެތް. ރެޑް ޗިލީސްއަށް ގޮސް އަހަރެމެންގެ ހާލަތު ކިޔައިދިނިން. މިއީ ސަރަހައްދީ ފިލްމެއް ކަމަށާއި ބަޖެޓު ކުޑަކަމަށް ބުނެ އެހީތެރިކަމަށް އެދުނިން،" ތަރްޑޭ ކިޔައިދިނެވެ.

މި މައުލޫމާތު ޝާހްރުކް ޚާނާ ހަމައަށް ދިއުމުން، އޭނާ ވަނީ އެ ބިލު މާފުކޮށްދިނުމަށް އަންގާފައެވެ. ޝާހްރުކް ބުނެފައިވަނީ މިއީ މަރާޓީ ފިލްމަކަށް ވާތީ، ފައިސާއަށް ވުރެ ފިލްމު ރިލީޒްކުރުން މުހިންމު ކަމަށެވެ. އަދި ފިލްމު ރަނގަޅު ނަމަ ޑީސީޕީ ދޫކޮށްލުމަށާއި، ފައިސާގެ ކަންކަން ފަހުން ހަމަޖެއްސޭނެ ކަމަށް އޭނާ ބުނި ކަމަށް ޑައިރެކްޓަރު ހާމަކުރިއެވެ.

"މިއަދު މި ފިލްމު 100 ކްރޯޑާ ގާތްކުރާއިރު އެންމެންވެސް ތައުރީފު ކުރޭ. އެކަމަކު ފިލްމު ކާމިޔާބުވާނެ ކަމުގެ އެއްވެސް ޔަގީންކަމެއް ނެތް ވަގުތު ޝާހްރުކް ޚާން ވެދިން އެހީތެރިކަން އަބަދުވެސް ހަނދާން ހުންނާނެ،" ތަރްޑޭ އިތުރަށް ބުންޏެވެ.

ސެކްނިލްކްގެ ތަފާސްހިސާބުތަކުން ދައްކާ ގޮތުގައި 'ދިއޯލް ބޭންޑް 2' އަށް މިހާތަނަށް ވަނީ 81.78 ކްރޯޑް ރުޕީސް ލިބިފައެވެ. މި ފިލްމަކީ ދަނޑުވެރިން އަމިއްލައަށް މަރުވާ މައްސަލައާއި، ދީނީ އަގީދާގެ މައްޗަށް ބިނާކޮށް އުފައްދާފައިވާ އަސަރުގަދަ ފިލްމެކެވެ.