ސިނގިރޭޓާއި ދުންފަތުގެ ބާވަތްތަކުން ނަގާ ޑިއުޓީ ބޮޑުތަނުން ކުޑަކުރުމަށްޓަކައި ދިވެހިރާއްޖޭގެ އެކްސްޕޯޓް އިމްޕޯޓްގެ ގާނޫނަށް ސަރުކާރުން ހުށަހެޅި އިސްލާހު، ރައްޔިތުންގެ މަޖިލީހުގެ މުޅި މަޖިލީހުގެ ކޮމިޓީން މިއަދު ފާސްކޮށްފިއެވެ.

މި އިސްލާހު ފާސްކޮށްފައިވަނީ މިއަދުގެ ޖަލްސާ މެދުކަނޑާލުމަށްފަހު ކުރިއަށް ގެންދިޔަ ކޮމިޓީ ބައްދަލުވުމުގައި ބައިވެރިވެވަޑައިގެންނެވި 69 މެންބަރުންގެ އިއްތިފާގުންނެވެ. ސަރުކާރުގެ ފަރާތުން ކޮމަންޑޫ ދާއިރާގެ މެންބަރު މުހައްމަދު އިބްރާހީމް ހުށަހެޅުއްވި މި ބިލުގައިވަނީ، މިހާރު ސިނގިރޭޓާއި ބިޑި އަދި ހީޓަޑް ޓޮބޭކޯ އުފެއްދުންތަކުން ނަގަމުންދާ ޑިއުޓީއަށް ބޮޑެތި ލުއިތަކެއް ދިނުމަށެވެ.

Ad by Hajj Corporation

އެގޮތުން މިހާރު ނަގަމުންދާ 50 ޕަސެންޓްގެ އެޑްވެލޮރަމް ޑިއުޓީ 30 ޕަސެންޓަށް ކުޑަކުރުމަށާއި، ކޮންމެ ސިނގިރޭޓަކުން ނަގާ 8 ރުފިޔާގެ ޑިއުޓީ 4 ރުފިޔާއަށް ކުޑަކުރުން ހިމެނެއެވެ.މި ބަދަލަކީ ނޮވެމްބަރު 2024 ގައި ސިނގިރޭޓަކުން ނަގާ ޑިއުޓީ 3.30 ރުފިޔާ އިން 8 ރުފިޔާއަށް ބޮޑުކުރުމަށްފަހު، އަލުން އެ އަދަދު ދަށްކުރުމަށް ގެނެވޭ ބަދަލެކެވެ.

މި ބިލުގެ ފުރަތަމަ ކިޔުން މަޖިލީހުގައި އިއްވާފައިވަނީ މި މަހުގެ 22 ވަނަ ދުވަހުއެވެ.މީގެ އިތުރުން، ދުންފަތުގެ އިސްތިއުމާލު ކުރުން ހުއްޓާލުމަށް އެހީތެރިވެދޭ ބާވަތްތަކަށް ހިތްވަރު ދިނުމުގެ ގޮތުން، ނިކޮޓިން ޗުއިންގަމާއި ނިކޮޓިން ޕެޗް ފަދަ ތަކެތިން ނަގާ ޑިއުޓީ އެއްކޮށް ކަނޑާލުމަށްވެސް މި އިސްލާހުގައި ވަނީ ހިމަނާފައެވެ.