އީރާނުން ބައްދަލުވުމަކަށް އެދިފައިވާ ކަމަށާއި، އެގޮތުން ގަތަރުގެ ވެރިރަށް ދޯހާގައި އަންގާރަ ދުވަހު ދެ ގައުމުގެ ދެމެދުގައި ބައްދަލުވުމެއް ބޭއްވުމަށް ހަމަޖެހިފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ހޯމަ ދުވަހު އިއުލާނު ކުރައްވައިފިއެވެ.

ޓްރަމްޕްގެ ޓްރޫތް ސޯޝަލް އެކައުންޓުގައި ކުރެއްވި ކުރު ޕޯސްޓެއްގައި ވިދާޅުވީ، "އީރާނުން ބައްދަލުވުމަކަށް އެދިއްޖެ. މާދަމާ ދޯހާގައި އެ ބައްދަލުވުން އޮންނާނެ،" ކަމަށެވެ.

Ad by Hajj Corporation

ނަމަވެސް، އީރާނުގެ ޑެޕިއުޓީ ފޮރިން މިނިސްޓަރު ކާޒިމް ޣަރީބްއާބާދީ ވަނީ މި ހަފުތާގައި ދޯހާގައި އެމެރިކާއާއެކު އެއްވެސް "ޓެކްނިކަލް ވާހަކަތަކެއް" ބޭއްވުމަށް ތާވަލުކުރެވިފައި ނުވާ ކަމަށް ވިދާޅުވެ، އެމެރިކާގެ މީޑިއާ ރިޕޯޓުތައް ދޮގުކުރައްވާފައެވެ. އެހެންނަމަވެސް، މެދުވެރިން މެދުވެރިކޮށް ކުރިއަށްދާ މަޝްވަރާތައް މެދުނުކެނޑި ކުރިއަށްދާ ކަމަށް އޭނާ ފާހަގަކުރެއްވިއެވެ.

މި ބައްދަލުވުމުގައި ބައިވެރިވުމަށްޓަކައި ވައިޓް ހައުސްގެ މަންދޫބުން ކަމަށްވާ ސްޓީވް ވިޓްކޮފް އަދި ޖެރެޑް ކުޝްނަރ ދޯހާއަށް ވަޑައިގަންނަވާނެ ކަމަށް ވައިޓް ހައުސްގެ ތަރުޖަމާނު ކެރޮލިން ލީވިޓް ވަނީ ކަށަވަރުކޮށްދެއްވާފައެވެ. މި މަތީ ފަންތީގެ މަޝްވަރާތައް ކުރިއަށްދާނީ ޓެކްނިކަލް ފަންތީގެ މަޝްވަރާތަކުގެ އަރިމަތީގައި ކަމަށް ފޮކްސް ނިއުސްއަށް ދެއްވި އިންޓަވިއުއެއްގައި ލީވިޓް ވިދާޅުވިއެވެ.

ލީވިޓް އިތުރަށް ވިދާޅުވީ، ހަނގުރާމަ ހުއްޓާލުމުގެ އެއްބަސްވުމާ އެއްގޮތަށް އެމެރިކާއިން އަމަލުކުރަމުންދާ ކަމަށާއި، ނަމަވެސް ސުލްހައިގެ މަރުހަލާއަށް ރައީސް ޓްރަމްޕް އިސްކަންދެއްވާއިރުވެސް، އަސްކަރީ ބާރުގެ ބޭނުންކުރުމުގެ ހައްގު އެމެރިކާއަށް އޮންނާނެ ކަމަށެވެ. 

"އަނިޔާވެރިކަމަށް ރައްދުދޭނީ އަނިޔާވެރިކަމުން،" އޭނާ ވިދާޅުވިއެވެ. އަދި އެމެރިކާގެ މަސްލަހަތު ހިމާޔަތްކުރެވޭ ފަދަ އެއްބަސްވުމެއްގައި މެނުވީ ރައީސް ސޮއިނުކުރައްވާނެ ކަމަށްވެސް ވިދާޅުވިއެވެ.

މި ބައްދަލުވުން ބޭއްވުމަށް ތައްޔާރުވަމުން މިދަނީ، ފެބްރުއަރީ މަހުގެ ފަހުކޮޅު އެމެރިކާއާއި އިޒްރޭލުން ދިން ހަމަލާތަކާ ގުޅިގެން އީރާނުން ބަންދުކުރި ހޯރްމޫޒް ކަނޑުއޮޅީގެ މައްސަލައިގައި މަޝްވަރާކޮށް ހައްލެއް ހޯދުމަށް އެކްސިއޯސްއިން ރިޕޯޓުކޮށްފައިވާ ދަނޑިވަޅެއްގައެވެ. މީގެ ކުރިން އިސްލާމްއާބާދު މެމޮރެންޑަމްއަށްފަހު، އީރާނު ހަނގުރާމަ ނިމުމަކަށް ގެނައުމަށް ސްވިޒަލޭންޑުގައިވެސް ޓެކްނިކަލް މަޝްވަރާތަކެއް ވަނީ ކުރިއަށް ގޮސްފައެވެ.