މާލެ ސަރަހައްދުގައި ތޫނު ހަތިޔާރު ބޭނުންކޮށްގެން ހަމަނުޖެހުން ހިންގަން ރާވަމުންދިޔަ ކަމުގެ ތުހުމަތުގައި ފުލުހުން ހަ މީހަކު ހައްޔަރުކޮށްފިއެވެ.

ފުލުހުން ހާމަކުރި ގޮތުގައި، މާލެއާއި ހުޅުމާލޭގައި މާރާމާރީ ހިންގަން އުޅޭކަމުގެ މައުލޫމާތު ލިބިގެން، ކޯޓު އަމުރެއްގެ ދަށުން ރައިވެރި ހިނގުމުގައި ހުރި ގެސްޓް ހައުސަކާއި އެ ސަރަހައްދު ވަނީ ފާސްކޮށްފައެވެ.

Ad by Hajj Corporation

މި އޮޕަރޭޝަނުގައި ފުލުހުންގެ ބެލުމުގެ ދަށަށް ގެންގޮސްފައިވަނީ އުމުރުން 21 އަހަރާއި 34 އަހަރާ ދެމެދުގެ ހަ ދިވެހި ފިރިހެނުންނެވެ. އޭގެ ތެރޭގައި 30 އަހަރުގެ ދެ މީހަކާއި، 21 އަހަރުގެ މީހަކާއި، 23 އަހަރުގެ މީހަކާއި، 32 އަހަރުގެ މީހެއްގެ އިތުރުން 34 އަހަރުގެ މީހަކު ހިމެނެއެވެ.

ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، އޭގެ ތެރެއިން ހަތަރު މީހަކަށް 15 ދުވަހުގެ ބަންދުގެ މުއްދަތެއް ވަނީ ޖަހާފައެވެ. ނަމަވެސް ބާކީ ތިބި ދެ މީހުން ކޯޓުން ދޫކޮށްލާފައިވަނީ ވަކި ޝަރުތުތަކެއް ކުރުމަށްފަހުގައެވެ.

މި މައްސަލަ ފުލުހުން މިހާރު ދަނީ އިތުރަށް ތަހުގީގު ކުރަމުންނެވެ.