ދިވެހި ފުލުހުންގެ ޚިދުމަތުގެ އަސާސީ ތަމްރީނު ކޯހުގެ 42 ވަނަ ބުރު ނިންމާލުމަށްފަހު، އެކަމުގެ ޝަރަފުގެ ހިނގާލުން ބާއްވައިފިއެވެ. މި ޚާއްޞަ އިޙްތިފާލު ޝަރަފުވެރިކޮށްދެއްވީ ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވަޒީރު ޢަލީ އިޙްސާނެވެ. މި ރަސްމިއްޔާތުގައި ކޮމިޝަނަރ އޮފް ޕޮލިސް އަޙްމަދު މުޙައްމަދުގެ އިތުރުން މުއައްސަސާގެ އިސް ބޭފުޅުންނާއި ބޭރުގެ ޑިޕްލޮމެޓުން ބައިވެރިވެވަޑައިގެންނެވިއެވެ.

އައްޑޫ ސިޓީގައި ހުންނަ ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓުގައި މިއަހަރުގެ ފެބްރުއަރީ މަހު ފެށި މި ތަމްރީނު ޕްރޮގްރާމުގައި ޖުމްލަ 158 ފުލުހުން ބައިވެރިވިއެވެ. އޭގެ ތެރެއިން ކޯސް ކާމިޔާބުކަމާއެކު ނިންމާލީ 140 ފަރާތަކުންނެވެ. އޭގެ ތެރޭގައި ހިމެނެނީ 104 ފިރިހެން ފުލުހުންނާއި 36 އަންހެން ފުލުހުންނެވެ.

Ad by Hajj Corporation

މި ބެޗުގެ އެންމެ މޮޅު ދަރިވަރުގެ ޝަރަފު ހޯދީ ކޮންސްޓެބަލް އިބްރާހިމް އިރުފާހުއެވެ. އޭނާއަށް އެންމެ މޮޅު ދަރިވަރުގެ ހަނދާނީ ފިލާ ވަޒީރު ޢަލީ އިޙްސާން ހަވާލުކޮށްދެއްވިއިރު، ކޮމިޝަނަރސް އެކްސެލެންސް އެވޯޑު ހަވާލުކޮށްދެއްވީ ސީޕީ އަޙްމަދު މުޙައްމަދުއެވެ.

ރަސްމިއްޔާތުގައި ތަފާތު ދާއިރާތަކުން ވަނަތައް ހޯދި ފަރާތްތައް ވެސް އިޢުލާނުކުރިއެވެ. އެގޮތުން އިންޑޯ މާއްދާތަކުން އެއްވަނަ ކޮންސްޓެބަލް ރާކިން އަހުމަދު ހޯދިއިރު، އައުޓްޑޯ މާއްދާތަކުން އެންމެ ކުރި ހޯދީ ކޮންސްޓަބަލް ހުސައިން ރިޝްފާން ޢަލީއެވެ. މީގެ އިތުރުން، އެކި ސްކޮޑުތަކުން އެންމެ މޮޅު ދަރިވަރުންގެ ގޮތުގައި ކޮންސްޓެބަލް އަހުމަދު ޒައިން އަމްޖަދު، ކޮންސްޓަބަލް ރާކިން އަހުމަދު، ކޮންސްޓަބަލް އިބްރާހިމް އިރުފާހު އަދި ކޮންސްޓަބަލް އަހުމަދު ޝިޒާން ހޮވުނެވެ. މުޅި ކޯހުގެ އެންމެ މޮޅު ސްކޮޑަކަށް ހޮވުނީ އައިނެއްލާ ސްކޮޑެވެ.

ފުލުހުންގެ އަސާސީ ތަމްރީނަކީ ފުލުހުންގެ މަސައްކަތަށް ބޭނުންވާ ޢިލްމާއި، ހުނަރާއި، އަދި އަޚްލާޤީ މިންގަނޑުތައް ދަސްކޮށްދިނުމަށް ހިންގާ މުހިންމު ކޯހެކެވެ. މި ކޯހުގެ ތެރެއިން ހަށިހެޔޮކަމާއި، އޮޕަރޭޝަނަލް އުކުޅުތަކާއި، ޤާނޫނީ ކަންކަމުގެ އިތުރުން ފުލުހުންގެ ޚިދުމަތާ ގުޅުންހުރި ގިނަ ތަމްރީނުތަކެއް ފޯރުކޮށްދެއެވެ.