ޕާސްޕޯޓު ހެއްދުމަށް ހުށަހަޅާ ފޮޓޯތަކަކީ އާޓިފިޝަލް އިންޓެލިޖެންސް (އޭއައި) ނުވަތަ އެނޫންވެސް ޑިޖިޓަލް ވަސީލަތްތައް ބޭނުންކޮށްގެން ބަދަލުތައް ގެނެސްފައިވާ ފޮޓޯތަކަކަށް ނުވުމަށް މޯލްޑިވްސް އިމިގްރޭޝަނުން އިލްތިމާސްކޮށްފިއެވެ.

އިމިގްރޭޝަނުން މީސްމީޑިއާގައި ހާމަކުރެއްވި ގޮތުގައި، އޭއައި ބޭނުންކޮށްގެން އެޑިޓްކޮށްފައިވާ ފޮޓޯތައް ހުށަހެޅުމަކީ ޕާސްޕޯޓަށް ކަނޑައަޅާފައިވާ ރަސްމީ މިންގަނޑުތަކާ ފުށުއަރާ ކަމެކެވެ. ޕާސްޕޯޓަކީ މީހާގެ އައިޑެންޓިޓީ ކަށަވަރުކޮށްދޭ ރައްކާތެރިކަމުގެ މުހިންމު ލިޔުމަކަށްވާތީ، މިފަދަ ލިޔުންތަކަށް އެދި ހުށަހަޅާއިރު މިކަންކަމަށް ޚާއްޞަ ސަމާލުކަމެއް ދިނުމަށް އެ މުއައްސަސާއިން ވަނީ އެދިވަޑައިގެންފައެވެ.

Ad by Hajj Corporation

ފަހަކަށް އައިސް ފޮޓޯގެ ފެންވަރު ރަނގަޅުކުރުމަށާއި ސިފައަށް ބަދަލުތައް ގެނައުމަށް އޭއައި ޓެކްނޮލޮޖީ ބޭނުންކުރުން ވަނީ ވަރަށް ބޮޑަށް އާންމުވެފައެވެ. ނަމަވެސް، ރަސްމީ ބޭނުންތަކަށް ހުށަހަޅާ ފޮޓޯތަކަށް މިފަދަ ބަދަލުތައް ގެނައުމަކީ ސަލާމަތީ ގޮތުން ނުރައްކާތަކެއް ކުރިމަތިވެދާނެ ކަމެއް ކަމަށް އިމިގްރޭޝަނުން ފާހަގަކުރެއެވެ.

މީގެ އިތުރުން، މިފަދަ ފޮޓޯތައް ހުށަހެޅުމުން ފޯމު ބާތިލުވެ، ޕާސްޕޯޓު ލިބުން ލަސްވުމުގެ ފުރުސަތު އޮންނާނެކަމަށް އިމިގްރޭޝަނުން ވަނީ ބުނެފައެވެ. އެހެންކަމުން ޕާސްޕޯޓަށް އެދި ހުށަހަޅާއިރު، އެ އިދާރާގެ މިންގަނޑުތަކަށް ފެތޭ އަސްލު ފޮޓޯ ހުށަހެޅުމަށް ވަނީ އިރުޝާދު ދީފައެވެ.