ކުރީގެ އިމިގްރޭޝަން ކޮންޓްރޯލަރު ޝަމްއާން ވަހީދު މަގާމުގެ ބޭނުން ނަހަމަ ގޮތުގައި ހިފައި ބިދޭސީއެއްގެ އަތުން ފައިސާ ނެގި ކަމަށް ސާބިތުވެ، އޭނާ 25 އަހަރަށް ޖަލަށްލުމަށް ކްރިމިނަލް ކޯޓުން މިއަދު ހުކުމްކޮށްފިއެވެ. މި މައްސަލާގައި ޝަމްއާންގެ މައްޗަށް ތިން ދައުވާއެއް ސާބިތުވެފައިވެއެވެ.

ޝަމްއާންގެ މައްޗަށް އިއްވި ޖުމްލަ 25 އަހަރުގެ ޖަލު ހުކުމް ބެހިގެންވަނީ ތިން ކުށަކަށެވެ. އެގޮތުން ފޭރުމުގެ ކުށުގެ ދައުވާގައި އަށް އަހަރު، ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ކުށަށް ދެ އަހަރު، އަދި މަނީ ލޯންޑަރިންގެ ކުށަށް 15 އަހަރު ދުވަހުގެ ޖަލު ހުކުމެއް ވަނީ އިއްވާފައެވެ.

Ad by Hajj Corporation

މީގެ އިތުރުން ފަސް ލައްކަ ރުފިޔާއިން އޭނާ ޖޫރިމަނާކޮށް، ފޭރުނު ކަމަށް ބުނާ ފަސް ލައްކަ ރުފިޔާ ތިން މަސް ދުވަހުގެ ތެރޭގައި އަނބުރާ ހަވާލުކުރުމަށް ވެސް ކޯޓުން ވަނީ އަމުރުކޮށްފައެވެ.

މި މައްސަލައާ ގުޅިގެން ޝަމްއާން ފުރަތަމަ ހައްޔަރުކުރީ މާޗު 2025 ގައެވެ.

އޭނާ ވަނީ ޝަރީއަތް ނިމެންދެން ބަންދުގައި 278 ދުވަސް ހޭދަކޮށްފައެވެ. މި މައްސަލާގައި ޝަމްއާންގެ އިތުރުން އިމިގްރޭޝަންގެ ބައެއް އޮފިސަރުންނާއި އާންމު މީހަކު ވެސް ހައްޔަރުކުރިއިރު، އޭގެ ތެރެއިން ބައެއް މީހުން ވަނީ ދައުލަތާއެކު އިއުތިރާފު އެއްބަސްވުންތަކެއް ހަދާފައެވެ.