ބޮރޫޝިއާ ޑޯޓްމަންޑަށް ކުޅެމުން އަންނަ ޖަރުމަނުގެ ހުނަރުވެރި ވިންގަރ ކަރީމް އަޑެޔެމީ ހޯދުމަށް ސްޕެއިންގެ ބާސެލޯނާއިން ރަސްމީ ބިޑެއް ހުށަހަޅައި، އެ ކްލަބާއެކު މަޝްވަރާތައް ފަށައިފިއެވެ. މި ޚަބަރު ކަށަވަރުކޮށްދީފައިވަނީ މަޝްހޫރު ކުޅިވަރު ނޫސްވެރިން ކަމަށްވާ ފެބްރީޒިއޯ ރޮމާނޯ އާއި ޖިޖާންޓެސްގެ ޖެރާޑް ރޮމޭރޯއެވެ.

އެންތަނީ ގޯޑަންގެ ސޮއި ހޯދުމަށްފަހުވެސް ބާސެލޯނާއިން އަންނަނީ އެޓީމުގެ ފްލޭންކްތައް ވަރުގަދަ ކުރުމަށް މަސައްކަތް ކުރަމުންނެވެ. އުމުރުން 24 އަހަރުގެ އަޑެޔެމީ އަކީ ޔޫރަޕްގައި މިވަގުތު ހުރި އެންމެ ހަލުވި ކުޅުންތެރިންގެ ތެރޭގައި ހިމެނޭ ކުޅުންތެރިއެކެވެ. އޭނާ ވަނީ ނިމިދިޔަ ސީޒަނުގައި ޑޯޓްމަންޑަށް 10 ލަނޑު ޖަހައިދީ 6 އެސިސްޓް ފޯރުކޮށްދީފައެވެ.

Ad by Hajj Corporation

މައުލޫމާތު ލިބޭގޮތުގައި އަޑެޔެމީ ވަނީ ބާސެލޯނާއަށް ބަދަލުވުމަށް އޭނާގެ ރުހުން ދީފައެވެ. ބާސެލޯނާއިން މި ޓްރާންސްފާގެ ކަންކަން ކުރިއަށް ގެންދަނީ ވަރަށް ސިއްރުވެރި ގޮތަކަށެވެ. މިއީ އެންތަނީ ގޯޑަންގެ ޓްރާންސްފާގައިވެސް އެ ކްލަބުން އަމަލުކުރި ގޮތެވެ. މި ސޮއި ހޯދުމުގައި އެންމެ ބޮޑު ބާރަކަށްވެފައިވަނީ ބާސެލޯނާގެ ކޯޗު ހަންސީ ފްލިކް ކަމަށް ބެލެވެއެވެ.

އަޑެޔެމީ ގެނައުމަށް ބާސެލޯނާއިން މަސައްކަތް ކުރަމުން މިދަނީ، މިދިޔަ ސީޒަނުގައި ރަފީނިއާއަށް ކުރިމަތިވި އަނިޔާތަކާއި މާކަސް ރަޝްފޯޑްގެ ކުޅުން އެއްވަރެއްގައި ހިފެހެއްޓިފައި ނުވުމުގެ ސަބަބުން ވިންގް މަގާމުތަކަށް ދިމާވި ދަތިތަކަށް ހައްލެއް ހޯދުމަށެވެ. މީގެ އިތުރުން، ސައުދީ އަރަބިއްޔާގެ ކްލަބަކަށް ރަފީނިއާ ބަދަލުވާން އުޅޭކަމުގެ އަޑުތަކެއް ފެތުރިފައިވާއިރު، އަޑެޔެމީ އަކީ އޭނާގެ ބަދަލުގައި ގެންނަ ކުޅުންތެރިއެއް ކަމަށްވެސް ބެލެވެއެވެ.