"މަތީ އަރުތަވެރިންގެ އިނާމު 2025" ދިނުމަށް ބާއްވާ ސިލްސިލާ ރަސްމިއްޔާތުތަކުގެ ތިންވަނަ ދަންފަޅި، ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް މިރޭ ޝަރަފުވެރިކޮށްދެއްވައިފިއެވެ.

ހުޅުމާލޭގައި ހުންނަ ސެންޓަރ ފޯ ހަޔަރ ސެކަންޑަރީ އެޑިއުކޭޝަން (ސީ.އެޗް.އެސް.އީ) ގައި ކުރިއަށްދިޔަ މި ރަސްމިއްޔާތަށް ރައީސުލްޖުމްހޫރިއްޔާގެ ނައިބު ވަޑައިގެންނެވުމުން، އެމަނިކުފާނަށް ވަނީ އޮނަރ ގާޑެއް އަރުވާފައެވެ. އަދި މި ރަސްމިއްޔާތުގެ ތެރެއިން ދަރިވަރުންގެ ފަރާތުން އެމަނިކުފާނަށް ހޫނު މަރުޙަބާއެއް ދަންނަވައި، ހަނދާނީ ފިލައެއް ވަނީ އަރުވާފައެވެ.

Ad by Hajj Corporation

މިރޭގެ ދަންފަޅީގައި، މަތީ ޘާނަވީ ތަޢުލީމު ނިންމާ އިމްތިހާނުތަކުން މަތީ އަރުތަ ހޯދި 304 ދަރިވަރުންނަށް އިނާމާއި ހަނދާނީލިޔުން ހަވާލުކޮށްފައިވެއެވެ.

މި ދަރިވަރުންނަށް އިނާމުތައް ހަވާލުކޮށްދެއްވީ ރައީސުލްޖުމްހޫރިއްޔާގެ ނައިބުގެ އިތުރުން، މިނިސްޓަރ އޮފް އެޑިއުކޭޝަން، ހަޔަރ އެޑިޔުކޭޝަން އެންޑް ސްކިލްސް ޑިވެލޮޕްމަންޓް، ޑޮކްޓަރ އިސްމާޢީލް ޝަފީޢު އާއި ދައުލަތުގެ އިސްވެރިންނެވެ.

މަތީ އަރުތަވެރިންގެ އިނާމު ދިނުމުގެ ރަސްމިއްޔާތަކީ މަތީ ޘާނަވީ އިމްތިހާނުތަކުން ދުނިޔޭގެ ފެންވަރުގައާއި ގައުމީ ފެންވަރުގައި ރަންވަނަތައް ހާސިލުކުރާ ދަރިވަރުންގެ ކާމިޔާބީ ފާހަގަކޮށް، އެކަމުގެ އަގުވަޒަންކުރުމުގެ ގޮތުން ބާއްވާ ރަސްމިއްޔާތެކެވެ.

މި އަހަރުގެ އިނާމު ދިނުމުގެ ހަފުލާތައް ކުރިއަށްގެންދިއުމަށް ހަމަޖެހިފައިވަނީ ޖުމްލަ 5 ދަންފަޅިއަކަށް ބަހާލައިގެންނެވެ.