މިފްކޯގެ ބެލުމުގެ ދަށުގައި ހުރި އައިސްޕްލާންޓްތައް ފެނަކަ އަށް ބަދަލުކުރުމުން ވަރަށް ބޮޑު "މުސީބާތަކަށް" ވީ ކަމަށް ދަނޑުވެރިކަމާއި ކަނޑުގެ ވަސީލަތްތަކާބެހޭ ވަޒީރު އަޙްމަދު ޝިޔާމް ވިދާޅުވެއްޖެ އެވެ.

ރައްޔިތުން މަޖިލީހުގައި މެމްބަރުން ކުރެއްވި ސުވާލުތަކަށް ޖަވާބު ދެއްވަމުން ވަޒީރު ވިދާޅުވީ މިފްކޯގެ ބެލުމުގެ ދަށުގައި ހުރި އައިސްޕްލާންޓްތައް ކުޅެން ނޭނގެ ބަޔާކާ ހަވަލު ކުރުމުން ދެބައިކުޅަ އެއްބައި އައިސްޕްލާންޓްތައް ހަލާކުވެފައިވާ ކަމަށެވެ. އަދި އެބަދަލު އެގޮތަށް ގެނައީ އޭރު އޮތް ސަރުކާރުން ކަމަށް ވެސް ޝިޔާމް ފާހަގަ ކުރެއްވެވި އެވެ.

Ad by Hajj Corporation

ވަޒީރު ވިދާޅުވީ މޫސުމީ މަސްވެރިކަމެއްކުރާއިރު، އައިސް އެކަށީގެންވާ ވަރަށް ނުލިބުމަކީ މަސްވެރިންނަށް އޮތް ވަރަށް ބޮޑު ގޮންޖެހުމެއް ކަމަށެވެވެ. އެކަށީގެންވާ ވަރަށް މަސްރައްކާކުރެވޭނެ ނިޒާމެއް ނެތުމުން ބޭރުގެ ބާޒާރުގައި މަހަށް ލިބެންޖެހޭ ހަމަ އަގު ނުލިބޭ ކަމަށް ވެސް މިނިސްޓަރު ފާހަގަ ކުރެއްވެވި އެވެ.

މިނިސްޓަރު ވިދާޅުވީ މަސްވެރިންނަށް ދަތިވާ ކަންކަމުގެ ޖުމްލަ ހައްލެއް ގެނައުމަށް މަސައްކަތްތަކެއް ކުރަމުން އަންނަ ކަމަށެވެ. އަދި ކުރިޔަށް އޮތްތާ މަސްދޯނީގައި ލޮނުފެން ފިނިކުރެވޭނެ ނިޒާމެއް ގާއިމު ކުރުމުން އައިސް ޕްލާންޓްތައް ހުންނަ ރަށްރަށަށް ދަތުރުކޮށްގެން އައިސް އަޅަން ކޮންމެހެން ނުޖެހޭނެ ކަމަށް ވެސް ޝިޔާމް ފާހަގަ ކުރެއްވެވި އެވެ.