އީރާނުގެ އެކި ސަރަހައްދުތަކުގައި ހުރި އިންފްރާސްޓްރަކްޗަރތަކަށް އަމާޒުކޮށް ރޭގަނޑު އެމެރިކާއިން ދިން ވަރުގަދަ ވައިގެ ހަމަލާތަކެއްގައި 8 މީހުން މަރުވެ، 20 މީހުން ޒަޚަމްވެފައިވާ ކަމަށް އީރާނުގެ ދައުލަތުގެ މީޑިއާ، އިރްނާ އިން މިއަދު ރިޕޯޓްކޮށްފިއެވެ.

އިރްނާއިން ބުނި ގޮތުގައި މި ހަމަލާތައް ދީފައިވަނީ ބުރާސްފަތި ދުވަހުގެ ރޭގަނޑާއި ހުކުރު ދުވަހުގެ ހެނދުނުގެ ވަގުތުތަކުގައެވެ. މި ހަމަލާތަކުގައި އީރާނުގެ އެކި ޕްރޮވިންސްތަކުގެ މުހިންމު ވަސީލަތްތަކަށް ވަނީ ބޮޑެތި ގެއްލުންތަކެއް ދީފައެވެ.

Ad by Hajj Corporation

އީރާނުގެ ހެލްތު މިނިސްޓްރީގެ ޕަބްލިކް ރިލޭޝަންސް އެންޑް އިންފޮމޭޝަން ސެންޓަރުގެ އިސްވެރިޔާ ހުސައިން ކަރްމަންޕޫރު ސޯޝަލް މީޑިއާގައި ވިދާޅުވި ގޮތުގައި، މި މަހުގެ ތެރޭގައި އެމެރިކާއިން ދޭން ފެށި ހަމަލާތަކުގައި މަރުވި މީހުންގެ ޖުމްލަ އަދަދު މިހާރު ވަނީ 38 އަށް އަރާފައެވެ. އަދި 400 އަށްވުރެ ގިނަ މީހުން ވަނީ ޒަޚަމްވެފައެވެ.

ކަރްމަންޕޫރު އިތުރަށް ހާމަކުރެއްވި ގޮތުގައި، އެންމެ ފަހުން މަރުވި މީހުންގެ ތެރޭގައި ތިން އަންހެނުންނާއި 18 އަހަރުން ދަށުގެ ކުއްޖަކު ހިމެނެއެވެ. އަދި ޒަޚަމްވި މީހުންގެ ތެރޭގައި 22 އަންހެނުންނާއި 9 ކުޑަކުދިން ހިމެނޭއިރު، 47 މީހަކަށް އަދިވެސް ހޮސްޕިޓަލުގައި ދަނީ ފަރުވާ ދެމުންނެވެ.

އެމެރިކާގެ ސެންޓްރަލް ކޮމާންޑުން ބުނެފައިވަނީ އީރާނުގެ އަސްކަރީ ވަސީލަތްތަކަށް އަމާޒުކޮށް ދިން މި ހަމަލާތަކަކީ ޖެހިޖެހިގެން ހަވަނަ ރޭ ދިން ހަމަލާތަކެއް ކަމަށެވެ.

މިދިޔަ ފެބްރުއަރީ މަހުން ފެށިގެން އެމެރިކާއާއި އިސްރާއީލުން ގުޅިގެން އީރާނާ ދެކޮޅަށް ހަމަލާތައް ދޭން ފެށުމާއެކު މެދުއިރުމަތީގެ މަސްރަހު ވަނީ ވަރަށް ބޮޑަށް ގޯސްވެފައެވެ. މީގެ ރައްދުގައި އީރާނުންވެސް ދަނީ އެމެރިކާގެ އަސްކަރީ މަރުކަޒުތައް ހުރި ގަލްފުގެ ގައުމުތަކަށް މިސައިލާއި ޑްރޯން ހަމަލާތައް ދެމުންނެވެ.

ދެގައުމުގެ ދެމެދުގައި އުފެދިފައިވާ ހަމަނުޖެހުންތައް ނިމުމަކަށް ގެނައުމަށްޓަކައި ޕާކިސްތާނުގެ މެދުވެރިކަމާއެކު މިދިޔަ މަހު އެމެރިކާއާއި އީރާނާ ދެމެދު އެއްބަސްވުމެއްގައި ސޮއިކުރި ނަމަވެސް، ހޯރްމުޒް ކަނޑުއޮޅީގެ މައްސަލައިގައި ދެފަރާތުން ދެމުންދާ ހަމަލާތަކުގެ ސަބަބުން މަސްރަހު އަނެއްކާވެސް ވަނީ ވަރަށް ބޮޑަށް ނުތަނަވަސްވެފައެވެ.