މެދުއިރުމަތީގެ މަސްރަޙު ނުތަނަވަސްވެ، އެމެރިކާއާއި އީރާނުން އެކަކު އަނެކަކަށް ދެމުންގެންދާ ހަމަލާތައް ހުކުރު ދުވަހު ވަނީ އިތުރަށް ވަރުގަދަކޮށްފައެވެ. ދުނިޔޭގެ ހަކަތައިގެ މައިނާރު ކަމަށްވާ ހޮރްމުޒް ކަނޑުއޮޅީގެ ކޮންޓްރޯލް ހޯދުމަށް ކުރާ މި ހަނގުރާމައިގައި، ދެ ގައުމުން ވެސް ވަނީ އަސްކަރީ އަމާޒުތަކުގެ އިތުރުން މުހިންމު އިންފްރާސްޓްރަކްޗަރތަކަށް ހަމަލާދީފައެވެ.

އެމެރިކާއިން އީރާނަށް ދެމުންގެންދާ ހަމަލާތައް ފުޅާކޮށް، އީރާނުގެ ދެކުނުގެ ހޮރްމުޒްގާން ޕްރޮވިންސްގެ ބްރިޖްތަކަށާއި ހަކަތަ އުފައްދާ މަރުކަޒުތަކަށް ވަނީ ހަމަލާދީފައެވެ. މި ހަމަލާތަކުގައި އީރާނުގެ މުހިންމު ބަނދަރެއް ކަމަށްވާ ޗަބަހާރު ބަނދަރުގެ މުހިންމު ޓަވަރެއް ވަނީ ވައްޓާލާފައެވެ. އެމެރިކާގެ ސެންޓްރަލް ކޮމާންޑުން ބުނި ގޮތުގައި މިއީ އީރާނުގެ އަސްކަރީ ގާބިލްކަން ކުޑަކުރުމަށްޓަކައި މެދުނުކެނޑި ހަމަލާދިން ހަތްވަނަ ރެޔެވެ.

Ad by Hajj Corporation

މި ހަމަލާތަކަށް ރައްދު ދިނުމުގެ ގޮތުން އީރާނުން ވަނީ އެމެރިކާއާ ގާތް ގުޅުމެއް އޮންނަ އަދި މި ހަނގުރާމައިގައި މެދުވެރިއެއްގެ ދައުރު އަދާކުރާ ގަތަރަށާއި ކުވައިތަށް މިސައިލް ހަމަލާތަކެއް ފޮނުވާލާފައެވެ. ކުވައިތުގެ ކަނޑުފެން މީރުފެަނަށް ހަދާ ޕްލާންޓަކަށް ހަމަލާ އަމާޒުވުމުގެ ސަބަބުން އެތަނަށް ބޮޑެތި ގެއްލުންތަކެއް ލިބިފައިވާކަމަށް އެ ގައުމުން ރިޕޯޓްކޮށްފައިވެއެވެ. މީގެ އިތުރުން ބަހްރޭނާއި އުރުދުންއަށް ވެސް އީރާނުގެ ހަމަލާތައް އަމާޒުވެފައިވާކަމަށް މައުލޫމާތު ލިބެއެވެ.

އީރާނުގެ އޮފިޝަލުން ހާމަކުރި ގޮތުގައި އެމެރިކާގެ ހަމަލާތަކުގައި މިހާތަނަށް 46 މީހުން މަރުވެ 400 އަށްވުރެ ގިނަ މީހުން ވަނީ ޒަޚަމްވެފައެވެ. ހަމައެއާއެކު، އެމެރިކާގެ އަސްކަރިއްޔާއިން ވެސް ވަނީ އެ ގައުމުގެ 13 ސިފައިންނަށް އަނިޔާވެފައިވާކަމަށް އެއްބަސްވެފައެވެ.

މި ހަމަނުޖެހުންތަކާ ގުޅިގެން ދުނިޔޭގެ ބާޒާރުގައި ތެލުގެ އަގު ވަނީ ފީފާއަކަށް 86 ޑޮލަރަށްވުރެ މައްޗަށް އުފުލިފައެވެ. އީރާނުން ހޮރްމުޒް ކަނޑުއޮޅި ބަންދުކޮށްފައި އޮތުމުގެ ސަބަބުން، އެ ސަރަހައްދުން ދަތުރުކުރާ އާގުބޯޓުތަކުގެ އަދަދު ވަނީ ފާއިތުވި ތިން ހަފުތާގެ އެންމެ ދަށް މިންވަރަށް ވެއްޓިފައެވެ.

އެމެރިކާގެ ރައީސް ޑޮނަލްޑް ޓްރަމްޕް ބުރާސްފަތި ދުވަހު ވިދާޅުވީ، އީރާނާ ދެކޮޅަށް ކުރާ ހަނގުރާމައިގައި އެމެރިކާއަށް ބޮޑެތި ކުރިއެރުންތަކެއް ލިބެމުންދާ ކަމަށާއި އޭގެ ނަތީޖާ ވަރަށް އަވަހަށް ފެންނާނެ ކަމަށެވެ. ނަމަވެސް، ހަތަރު މަހަށްވުރެ ގިނަ ދުވަސްވެފައިވާ މި ހަނގުރާމަ ހުއްޓުމަކަށް އަންނާނެ ސީދާ ތާރީޚެއް އަދި ފެންނާކަށް ނެތެވެ.