ހުޅުމާލޭ ފޭސް 1 ގައި ހުންނަ އަޒީޒާ މޫސާ މިސްކިތަށް ގެއްލުން ދިން ކަމަށް ތުހުމަތުކުރެވޭ މީހާގެ ހާލަތަށް ރިއާޔަތްކޮށް، އަޅަންޖެހޭ ފިޔަވަޅުތައް އެޅުމުގެ މަސައްކަތް ކުރަމުންދާ ކަމަށް ދިވެހި ފުލުހުންގެ ޚިދުމަތުން މިއަދު ބުނެފިއެވެ.

ފުލުހުން ބުނީ، ހުޅުމާލޭ ޗަނބޭލީ މަގުގައި ހުންނަ މި މިސްކިތަށް ގެއްލުން ދީފައިވާ މައްސަލަ ފުލުހުންނަށް ރިޕޯޓްކޮށްފައިވަނީ 2026 ޖުލައި 20 ވަނަ ދުވަހު ކަމަށެވެ. އެ މައްސަލަ ހުށަހެޅުމާއެކު ފުލުހުން ވަނީ އެކަމުގެ ތަހުގީގު ފަށާފައެވެ.

Ad by Hajj Corporation

މި މައްސަލައިގެ ތަހުގީގާ ގުޅޭގޮތުން ފުލުހުން މިއަދު ބުނީ، މިސްކިތަށް ގެއްލުން ދިން ކަމަށް ތުހުމަތުކުރެވޭ މީހާ މިހާރު ދެނެގަނެވިފައިވާ ކަމަށެވެ. އަދި އެ މީހާގެ ހާލަތު ހުރި ގޮތަށް ރިއާޔަތްކޮށް، ކަމާބެހޭ އިދާރާތަކާ ގުޅިގެން އަޅަންޖެހޭ އެންމެހައި ފިޔަވަޅުތައް އެޅުމުގެ މަސައްކަތް ކުރަމުންދާ ކަމަށްވެސް ފުލުހުން ބުނެފައިވެއެވެ. ނަމަވެސް އެ މީހާގެ ހާލަތާ ގުޅޭ އިތުރު ތަފްސީލެއް ފުލުހުން ހާމައެއް ނުކުރެއެވެ.

މި ހާދިސާއާ ގުޅިގެން ސޯޝަލް މީޑިއާގައި އާންމުވެފައިވާ ފޮޓޯތަކުން ފެންނަ ގޮތުގައި، އަޒީޒާ މޫސާ މިސްކިތަށް ވަންނަން ހުންނަ މައި ދޮރުގެ ބިއްލޫރިގަނޑު ވަނީ ދެ ހިސާބަކުން ތަޅައިގެން ގޮސްފައެވެ.