ދަތުރުވެރިން މަޑުކޮށްލާނެ ހިތްފަސޭހަ އާ ޖާގައެއް ވެލާނާ އިންޓަނޭޝަނަލް އެއާޕޯޓުގެ، ވީއައިއޭގައި ބޭނުން ކުރަން ފަށައިފި ކަމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް، އެމްއޭސީއެލް ބުނެފި އެވެ.

އެމްއޭސީއެލް އިން ބުނީ މި އާ ޖގަ ބޭނުން ކުރަން ފެށީ މިމަހުގެ 25 ވަނަ ދުވަހު ކަމަށެވެ. މީޖަގަ ތައްޔާރުކޮށްފައި ވަނީ ވީއައިއޭގެ އެއްވަނަ ޓާމިނަލްގަ އެވެ. އެމްއޭސީއެލުން ވަނީ މި ޖާގައި ބޭންކް އޮފް މޯލްޑިވްސްގެ ހާއްސަ ކައުންޓަރެއްވެސް ގާއިމުކޮށްފަ އެވެ. މިކައުންޓަރު މެދުވެރިކޮށް ބޭރު ފައިސާ މާރުކުރުމުގެ ހިދުމަތާއި، ދިވެހި ރައްޔިތުންނަށް ޑޮލަރު ދޫކުރުމުގެ ހިދުމަތް ލިބޭނެ ކަމަށް އެމްއޭސީއެލުން މައުލޫމާތުދެ އެވެ.

Ad by Hajj Corporation

އެމްއޭސީއެލުން ބުނީ މިއީ އެއާޕޯޓުން ފުރާ ފަރާތްތަކަށް ލިބޭ ހިދުމަތްތަކުގެ ފެންވަރު މަތިކޮށް، ދަތުރުވެރިންނަށް ލުއިފަސޭހަ އަދި ހިތްގައިމު މާހައުލެއް ފޯރުކޮށްދިނުމަށްޓަކައި އެޅުނު މުހިންމު ފިޔަވަޅެއް ކަމަށެވެ.އަލަށް ހުޅުވި މި ޖާގައާއެކު، ޓާމިނަލްގެ ފުރަތަމަ ބުރީގައި ފަސިންޖަރުން މަޑުކޮށްލައިގެން ތިބުމަށް ގާތްގަނޑަކަށް 750 އަކަމީޓަރުގެ އާ ސަރަހައްދެއް އިތުރުވެފައިވާ ކަމަށާއި މިތަނުގައި ދަތުރުވެރިން ފުރުމުގެ ކުރިން އަރާމުކޮށްލުމަށްޓަކައި ތަފާތު ވައްތަރުގެ ގޮނޑިތައް އަތުރާފައިވަނީ ހިތްފަސޭހަ މާހައުލެއް ލިބޭނޭ ގޮތަށްކަމަށް އެމްއޭސީއެލުން މައުލޫމާތުދެ އެވެ.

މި ޖާގައި ކުޑަކުދިންނަށް ހާއްސަ 136 އަކަމީޓަރުގެ ކުޅޭ ސަރަހައްދެއް ވަނީ ތަރައްގީކޮށްފައި ވާއިރު މި ސަރަހައްދުގައި އެކި ލެވެލްތަކުގެ ޕްލޭ ފްލެޓްފޯމްތަކާއި، ރައްކާތެރި ހޮޅިތަކާއި، ވާ އަދި ރިންގު ބޭނުންކޮށްގެން އަރާ ފޭބޭނެ ވަސީލަތްތަކުގެ އިތުރުން ބޯޅަ ކުޅޭ ޖާގައެއް ހިމެނެ އެވެ. މިއީ ޓާމިނަލް އެކަކުން ދަތުރުކުރާ އާއިލާތަކަށާއި ކުޑަކުދިންނަށް އަމާން އަދި އުފާވެރި ވަގުތުކޮޅެއް ހޭދަކުރެވޭނެ ގޮތަށް ފަރުމާކޮށްފައިވާ ތަނެއްކަމަށް އެމްއޭސީއެލުން މައުލޫމާތުދެ އެވެ.

އެމްއޭސީއެލުން ބުނީ މި އާ ޖާގަ ހުޅުވުމަކީ ޓާމިނަލް އެކެއްގެ ހިދުމަތްތައް ތަރައްގީކުރުމަށް އެކުންފުނިން ކުރަމުންދާ މަސައްކަތަށް ލިބުނު ބޮޑު ކުރިއެރުމެއް ކަމަށެވެ. އަދި  މިއީ ވެލާނާ އިންޓަނޭޝަނަލް އެއާޕޯޓް ޒަމާނީކޮށް، ހުރިހާ ފަރާތްތަކަށް ބޭނުންކުރެވޭ ގޮތަށް ފަސިންޖަރުންގެ ބޭނުންތަކަށް އިސްކަންދޭ ތަނަކަށް ހެދުމަށް އެ ކުންފުނިން ދޭ އަހަންމިއްޔަތު ރަމްޒުކޮށްދޭ ކަމެއްކަމަށް އެމްއޭސީއެލުން މައުލޫމާތުދެ އެވެ.