ހޮޓެލް ބުކް ކުރުމަށް ފަހު ފޭކް ސްލިޕް ފޮނުވައި، ފައިސާ އަނބުރާ ދޭން އެދެމުންދާ މައްސަަލަތަކެއް ފެންމަތިވެ މިކަމަށް ހާއްސަ ސަމާލުކަމެއް ދޭން އެންޓި ސްކޭމް ސެންޓަރުން އެދިއްޖެއެވެ.

ފުލުހުން އިއްޔެ ވަނީ މިދިޔަ ހަފްތާގެ ސްކޭމް ތަފާސްހިސާބުތައް އާއްމުކޮށްފައެވެ. އެންޓި ސްކޭމް ސެެންޓަރުން ބުނީ، މި ހަފްތާގައި ޖުމްލަ 33 ސްކޭމް މައްސަލަ ރިޕޯޓުކުރެވިފައިވާއިރު، މިމައްސަލަތަކުގައި 184,235.00 ރުފިޔާގެ ގެއްލުމެއް ވެފައިވާ ކަމަަށެވެ. އަވަސް ފިޔަވަޅުތަކާއެކު 72,073.00 ރުފިޔާ ވަނީ ކާމިޔާބުކަމާއެކު އަނބުރާ ހޯދައިދެވިފައިވާ ކަމަށްވެސް އެ ސެންޓަރުންވަނީ ބުނެފައެވެ.

Ad by Hajj Corporation

އެ ސެންޓަރުން ބުނިގޮތުގައި، އޮންލައިން ވިޔަފާރި (އީ-ކޮމާސް) ސްކޭމްތަކަކީ މި ހަފްތާގައިވެސް އެންމެ ގިނައިން ރިޕޯޓުކޮށްފައިވާ މައްސަލަތަކެވެ. މިގޮތުން އެފަދަ 16 މައްސަލައެއް ރިޕޯޓްކޮށްފައިވާއިރު، ބުކިން ކެންސަލް/ރިފަންޑް ސްކޭމްގެ ހަތް މައްސަލައެއްވެސް ރިޕޯޓުކޮށްފައިވާ ކަމަށް އެ ސެންޓަރުން ވަނީ ބުނެފައެވެ.

މިހާރު ފެންމަތިވެފައިވާ ސްކޭމަކީ، މީސް މީޑިއާ މެދުވެރިކޮށް ހޮޓާ/އެޕާޓްމަންޓް ބުކިން ހެދުމަށްފަހު، ސައްހަނޫން ފައިސާ ފޮނުވި ސްލިޕް ހިއްސާކޮށް، ކުއްލި ކަމެއް ދިމާވެގެން ބުކިންގ ކެންސަލްކުރަން ބުނެ އަވަހަށް ފައިސާ އަނބުރާ ހޯދުމަށް އެދޭ ސްކޭމެކެވެ.

އެންޓި ސްކޭމް ސެންޓަރުން ވަނީ ބުކިން ކެންސަލް/ރިފަންޑް ސްކޭމް ހިންގާ ގޮތާއި ރައްކާތެރިވުމަށް އެޅިދާނެ ގޮތް ކިޔާދީފައެވެ. އެގޮތުން އެކައުންޓަށް ފައިސާ ޖަމާވެފައިވޭތޯ ކަށަވަރުކުރުމާއި ފައިސާ ފޮނުވިކަމުގެ ސްލިޕަށް އެކަނި އިތުބާރު ނުކޮށް، ރިފަންޑް ދިނުމުގެ ކުރިން އެކައުންޓަށް ފައިސާ ވަދެފައިވާކަން ބޭންކިން އެޕް މެދުވެރިކޮށް ޔަގީންކުރުމަށް ވަނީ އެދިފައެވެ.

އަދި ކުއްލި އަވަސްކަމެއް ދެއްކި ނަމަވެސް، ތަނުގެ ރަސްމީ ރިފަންޑް އުސޫލާ އެއްގޮތަށް އަމަލުކުރުމަށް ސަމާލުކަންދިނުމަށް ވެސް އެ ސެންޓަރުން ވަނީ އެދިފައެވެ.