މިފްކޯ މަސް ފިހާރަތަކުން ހުކުރު ދުވަހުވެސް ހިދުމަތްދޭ ގޮތަށް ނިންމައި ހިދުމަތް ދޭ ގަޑިތަކަށް ބަދަލު ގެނެސްފި އެވެ.

މިފްކޯއިން ނެރެފައިވާ ނޫސްބަޔާނެއްގައި ބުނެފައިވަނީ، އެކުންފުނީގެ މަސްފިހާރައިގެ ވިޔަފާރި ފުޅާކުރުމާއި އެކު، ކަސްޓަމަރުންނަށް ދެމުން ދޭ ހިދުމަތްތައް އިތުރަށް ހަރުދަނާ ކުރުމުގެ ގޮތުން މިއަދުން ފެށިގެން ކުންފުނީގެ ރީޓެއިލް ފިހާރަތައް ކޮންމެ ހުކުރު ދުވަހުވެސް ހުޅުވާ ގޮތަށް ނިންމާ، ވިޔަފާރިކުރާ ގަޑިތަކަށް ބަދަލުތަކެއް ގެނައުމަށް ނިންމާފައިވާ ކަމަށެވެ.

Ad by Hajj Corporation

އެގޮތުން ހުކުރު ދުވަހުގެ ހެނދުނު 8:30 އިން 10:30 އަށް އަދި ރޭގަނޑު 8:00 އިން 11:00 އަށް ފިހާރަތައް ހުޅުވާފައި ހުންނާނެ ކަމަށާއި ހަފުތާގެ އެހެން ދުވަސްތަކުގައި ނަމާދު ގަޑިތައް ފިޔަވައި ހެނދުނު 8:30 އިން ރޭގަނޑު 11:00 އަށް ފިހާރަތައް ހުޅުވާފައި ހުންނާނެ ކަމަށް މިފްކޯއިން ވަނީ ބުނެފައެވެ.

އެހެން ކަމުން މާލެއާއި ހުޅުމާލޭގައި ގާއިމުކޮށްފައިވާ މިފްކޯގެ މަސްފިހާރަތަކާއި އައްޑޫ މަސްފިހާރައިން މިއަދުން ފެށިގެން މިބަދަލާ އެއްގޮތަށް ހިދުމަތް ލިބެން ހުންނާނެ ކަމަށް އެ ނޫސް ބަޔާނުގައި ބުނެެފައިވެ އެވެ.

މިފްކޯއިންއިތުރަށް ބުނީ، މިގޮތަށް ބަދަލު ގެންނަން ނިންމާފައިވަނީ ހުކުރު ދުވަހަކީ އާއިލީ ބައްދަލުވުންތަކާއި މެންދުރުގެ ކެއުންތަކަށް ދިވެހިން ހާއްސަ އިސްކަމެއްދޭ ދުވަހަކަށްވުމާއިއެކު، އެ ވަގުތުތަކަށް ބޭނުންވާ ތާޒާ މަހުގެ ބާވަތްތައް ފަސޭހަކަމާއެކު އާންމުންނަށް ފޯރުކޮށްދިނުމުގެ ބޭނުމުގައި ކަމަށެވެ. އަދި ކޮންމެ ހުކުރު ދުވަހަކަށް ހާއްސަ ކޮށްގެން ތަފާތު ބާވަތްތަކުގެ އުފެއްދުންތައް ބާޒާރަށް ނެރުމަށް ހަމަޖެހިފައިވާ ކަމަށް މިފްކޯއިން ވަނީ ބުނެފަ އެވެ.

ހުކުރު ދުވަހަކީ ގިނަ ބަޔަކު މަސް ގަންނަން ބޭނުންވާ ދުވަހަކަށްވުމާއި އެކު މިއީ ކަސްޓަމަރުންނަށް ލިބޭނެ ވަރަށް ބޮޑު ފަސޭހައެއްގެ ގޮތުގައި އެކުންފުނިން ފާހަގަކުރައްބުނެފަިވަނީ މި ބަދަލުގެ ސަބަބުން ރަސްމީ ދުވަސްތަކުގައި ވަޒީފާގައި އުޅޭ މީހުންނަށް، ހަފުތާ ބަންދުގައި ގެއަށް ބޭނުންވާ މަހާއި މިފްކޯގެ އެހެނިހެން އުފެއްދުންތައް ގަތުމަށް ބޮޑު ލުޔެއް ލިބޭނެ ކަމަށެވެ.

މިފްކޯއިން ބުނީ، މި ބަދަލު ގެނެވިފައިވަނީ މާލެ ސަރަހައްދަށް ބޭނުންވާ މަހުގެ އުފެއްދުންތައް މެދުނުކެނޑި ފޯރުކޮށްދިނުމަށް ކަނޑުއޮތްގިރީގެ އޮޕަރޭޝަންތައް އަލުން ފަށައި، ދާދިފަހުން އެރަށުގައި ހިކިމަސް ފެކްޓްރީއަކާއި އައިސް ޕްލާންޓެއް ހުޅުވައި ހިދުމަތް ދޭން ފަށާފައިވާ ދަނޑިވަޅެއްގައި ކަމަށާއި އެގޮތުން މި މަޝްރޫއު ތަކާއި އެކު މިފްކޯގެ އުފެއްދުންތެރިކަން އިތުރުވެ، ކަސްޓަމަރުންގެ ޑިމާންޑާއި އެއްވަރަށް ހިދުމަތް ދިނުމުގެ ގާބިލުކަން މިހާރު އިތުރުވެފައިވާ ކަމަށެވެ.