ވެލާނާ އިންޓަނޭޝަނަލް އެއާޕޯޓުން ރާއްޖެއަށް އެތެރެވާން އުޅުނު މީހަކު، ހަށިގަނޑުގެ ތެރޭގައި ފޮރުވައިގެން (ދިރުވާލައިގެން) ގިނަ އަދަދެއްގެ މަސްތުވާތަކެތި އެތެރެކުރަން އުޅެނިކޮށް މޯލްޑިވްސް ކަސްޓަމްސް ސާވިސްއިން އަތުލައިގެންފިއެވެ.

މި މައްސަލައާ ގުޅޭގޮތުން ކަސްޓަމްސްއިން މިއަދު ހާމަކުރި މައުލޫމާތުގައިވާ ގޮތުން، މި ހާދިސާ ހިނގާފައިވަނީ 19 ޖުލައި 2026 ގައެވެ. އެއާޕޯޓުން ފާސްކުރި މި މީހާގެ އަމަލުތައް ހުރިގޮތުން ޝައްކު ކުރެވިގެން އިތުރަށް ބަލައި ފާސްކުރުމުގެ ތެރޭގައި، އޭނާގެ ހަށިގަނޑުގެ ތެރޭގައި އެއްޗެހިތަކެއް ހުރިކަން ވަނީ ފާހަގަކުރެވިފައެވެ.

Ad by Hajj Corporation

ކަސްޓަމްސްއިން ބުނި ގޮތުގައި އެ މީހާގެ ހަށިގަނޑުން ވަނީ މަސްތުވާތަކެތި ކަމަށް ޝައްކުކުރެވޭ 66 ބުލެޓް ފެނިފައެވެ. މި ތަކެތި ތަހުލީލު ކުރިއިރު، އެ ތަކެތި ވަނީ މަސްތުވާތަކެތީގެ ބާވަތެއް ކަމަށްވާ ކޮކެއިން (Cocaine) އަށް ޕޮޒިޓިވް ވެފައެވެ.

އަތުލައިގަނެވުނު މި ތަކެތީގެ ޖުމްލަ ބަރުދަނުގައި 1180 ގްރާމް ހުރި އިރު، މި ތަކެތީގެ މަގުމަތީ އަގު 2.9 މިލިއަން ދިވެހި ރުފިޔާއަށް ވުރެ އިތުރުވާނެ ކަމަށް ކަސްޓަމްސްއިން ލަފާކުރެއެވެ.