ފީފާ ބްރޭކްގައި ރާއްޖޭގެ ގައުމީ ޓީމާއި ބަންގްލަދޭޝްގެ ގައުމީ ޓީމު، އެކުވެރިކަމުގެ ދެ މެޗެއް ކުޅޭ ގޮތަށް ހަމަޖެހިއްޖެއެވެ.

އެކަން އިއުލާނުކޮށްފައިވަނީ ބަންގްލަދޭޝްގެ ފުޓްބޯޅަ ފެޑެރޭޝަނުންނެވެ. އެގޮތުން އެ ފެޑެރޭޝަނުން މިއަދު ކުރި އިއުލާނެއްގައި ބުނީ، އަންނަ މަހުގެ 13 ވަނަ ދުވަހާއި 16 ވަނަ ދުވަހު ރާއްޖެ އާއި ބަންގްލަދޭޝްގެ ގައުމީ ޓީމުގެ އެކުވެރިކަމުގެ މެޗުތަކެއް ކުޅުމަށް ނިންމާފައިވާ ކަމަށެވެ. އެ މެޗުތައް ކުޅެނީ އެގައުމުގައެވެ.

މިއީ މެދުކެނޑިފައި އޮތް ރާއްޖޭގެ ފުޓްބޯޅައިން، ފާއިތުވި އެއް އަހަރުގެ ތެރޭގައި ގައުމީ ފެންވަރެއްގައި ވެސް އެފަދަ މެޗެއް ކުޅޭނެ ފުރަތަމަ ފަހަރެވެ. ރާއްޖޭގެ މައި ފުޓްބޯޅަ ލީގު ވެސް ހުއްޓިފައި އޮތް އިރު، އެ މެޗުތައް ވާނީ ރާއްޖޭގެ ޓީމަށް ޗެލެންޖެކަށް ކަމަށް ގިނަ ފަރާތްތަކުން ދެކެއެވެ.

އެގޮތުން ގައުމީ ފެންވަރެއްގައި ރާއްޖޭގެ ގައުމީ ޓީމު، އެންމެ ފަހުން މެޗެއް ކުޅުނީ މިދިޔަ އަަހަރު އޮތް ވޯލްޑް ކަޕް ކޮލިފައިންގައި ވެސް ބަންގްލަދޭޝްއާ ދެކޮޅަށެވެ. އެގޮތުން ވޯލްޑް ކަޕް ކޮލިފައިންގައި މިދިޔަ އަހަރުގެ އޮކްޓޯބަރު މަހުގެ މަހުގެ 12 ވަނަ ދުވަހު އެންމެ ފުރަތަމަ ރާއްޖޭގައި ކުޅުނު މެޗުން ދެ ޓީމު އެއްވަރުވިއިރު، އޮކްޓޯބަރު މަހުގެ 17 ވަނަ ދުވަހު، އެ ގައުމުގައި ކުޅުނު މެޗުން ރާއްޖޭގެ ޓީމު ވަނީ ދެ ލަނޑު، އެއް ލަނޑުން ބަލިވެފައެވެ.