ސައޫދީ ޢަރަބިއްޔާގެ މައްކާގައި ބޭއްވި ދުނިޔޭގެ އެންމެ ބޮޑު ބައިނަލްއަޤްވާމީ ޤުރުއާން ހިތުން ކިޔެވުމުގެ މުބާރާތުގައި ދިވެހިރާއްޖެ ތަމްސީލުކޮށް، މުޅި ޤުރުއާން ހިތުން ކިޔެވުމުގެ ގޮފިން ދިވެހި ބައިވެރިޔާ އަލްޙާފިޒާ ފާޠިމަތު ޝާޔާ ޒާހިރު ފަޚުރުވެރި 4 ވަނަ ޙާޞިލްކޮށްފިއެވެ.

މއ. އަސާސް، އަލްޙާފިޒާ ފާޠިމަތު ޝާޔާ ޒާހިރު ހޯދި މި ކާމިޔާބީއާ އެކު، އޭނާއަށް ވަނީ އިނާމެއްގެ ގޮތުގައި 170،000 (އެއްލައްކަ ހަތްދިހަ ހާސް) ސައޫދީ ރިޔާލް ލިބިފައެވެ.

Ad by Hajj Corporation

މިއީ ވޭތުވެދިޔަ 46 އަހަރުވަންދެން ދުނިޔޭގައި ބާއްވަމުން އަންނަ މި މުބާރާތުގެ 46 ވަނަ ދައުރެވެ. މިފަހަރުގެ މުބާރާތުގައި ދުނިޔޭގެ 133 ޤައުމަކުން ބައިވެރިން ވާދަކޮށްފައިވާއިރު، މިއީ މުބާރާތުގެ ދިގު ތާރީޚުގައި އަންހެން ކުދިންގެ ބައި ހިމަނައި، އަންހެން ކުދިން ވާދަކުރި ފުރަތަމަ ފަހަރެވެ.

މި މުބާރާތުގެ ނަތީޖާ ފާޅުކުރުމާއި ވަނަތަކަށް އިނާމު ދިނުން އޮތީ ރޭ މަސްޖިދުލް ޙަރަމް (ޙަރަމްފުޅު) ގައި ބޭއްވި ޚާއްޞަ ރަސްމިއްޔާތެއްގައެވެ. މި ޖަލްސާ ޝަރަފްވެރިކޮށްދެއްވީ މައްކާގެ އަމީރުގެ ނައިބު ހިޒް ރޯޔަލް ހައިނަސް ޕްރިންސް ސުޢޫދު ބިން މިޝްޢަލް ބިން ޢަބްދުލްޢަޒީޒެވެ.

މީގެ އިތުރުން މި ޙަފްލާގައި ސައޫދީ އިސްލާމިކް މިނިސްޓަރު ޑރ. ޢަބްދުއްލަޠީފް އާލުއްޝައިޚާއި ޙަރަމްފުޅުގެ އިމާމު ޝައިޚް ޑރ. ޢަބްދުއްރަޙްމާނުއް ސުދައިސް ވެސް ބައިވެރިވެވަޑައިގެންނެވިއެވެ.

މި ބޮޑު މުބާރާތުން ރާއްޖެ ތަމްސީލުކުރި ބައިވެރިއަކަށް ވަނައެއް ލިބުމަކީ މުޅި ރާއްޖެއަށް ލިބުނު ބޮޑު ފަޚުރަކާއި ޝަރަފެކެވެ. މުބާރާތުގެ ނަތީޖާ ފާޅުކުރުމަށްފަހު ސައޫދީ އިސްލާމިކް މިނިސްޓަރު ޑރ. ޢަބްދުއްލަޠީފް އާލުއްޝައިޚު ވަނީ ޚުދު ޝާޔާއާއި އޭނާގެ ބެލެނިވެރިންގެ އަރިހަށް ވަޑައިގެން، ޝާޔާ ހޯދި މަތިވެރި ކާމިޔާބީއަށް ތަހުނިޔާ ވިދާޅުވެ، ކުރިއަށް ދިއުމަށް ހިތްވަރު ދެއްވާފައެވެ.