އިސްލާމީކަންތައްތަކާއި އައުޤާފާ ބެހޭ ވުޒާރާގެ ވަގްފު ފަންޑަށް އެހީވުމަށް މޯލްޑިވްސް އިންލަންޑް ރެވެނިއު އޮތޯރިޓީ (މީރާ) ގެ ވެބްސައިޓް މެދުވެރިކޮށް ހުޅުވާލި ފުރުސަތުގައި، މިހާތަނަށް 3 މިލިއަނަށްވުރެ ގިނަ ރުފިޔާ ލިބިފައިވާކަން އެ ވުޒާރާއިން ހާމަކުރައްވައިފިއެވެ.

މިކަމާ ގުޅޭ މަޢުލޫމާތު ހިއްސާކުރައްވަމުން އިސްލާމީކަންތައްތަކާއި އައުޤާފާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވީ، އިސްލާމީ ކަންތައްތަކަށް އެހީވާ ވަޤުފު ފަންޑު ތަރައްޤީކޮށް، އެ ފަންޑަށް އެހީވުމަށް މީރާ ވެބްސައިޓްގެ ތެރެއިން ވަޤުފުކުރުމާއި ޞަދަޤާތްކުރުމަށް ޚާއްޞަ ލިންކުތަކެއް ޤާއިމުކުރެވިފައިވާ ކަމަށެވެ. އަދި މި އަހަރުގެ މިހާތަނަށް އެ ލިންކުތައް މެދުވެރިކޮށް 3 މިލިއަނަށް ވުރެ ގިނަ ރުފިޔާ ލިބިފައިވާ ކަމަށް ވަޒީރު ވިދާޅުވިއެވެ.

Ad by Hajj Corporation

ވަޒީރު އިތުރަށް ވިދާޅުވި ގޮތުގައި، މިގޮތަށް ލިބޭ ފައިސާ ޚަރަދުކުރަމުންދަނީ ވަޤުފު ފަންޑުގެ ޓްރަސްޓް ސްޓޭޓްމަންޓްގައި ބަޔާންވެގެންވާ ކަންކަމަށެވެ. މި ހުރިހާ ޚަރަދެއްވެސް ކުރިއަށްދަނީ ވަޤުފު ފަންޑުގެ އުޞޫލުތަކާ އެއްގޮތްވާ ގޮތުގެ މަތިންކަން ވަޒީރު ފާހަގަކުރެއްވިއެވެ.

ވަޤުފު ފަންޑަކީ ރާއްޖޭގައި އިސްލާމީ ކަންތައްތައް ކުރިއެރުވުމަށާއި، ދީނީ އެކިއެކި މަޝްރޫޢުތަކަށް އެހީތެރިކަން ފޯރުކޮށްދިނުމަށް އުފައްދާފައިވާ މުހިންމު ފަންޑެކެވެ.

މީރާގެ ވެބްސައިޓް މެދުވެރިކޮށް މި ފަންޑަށް ފައިސާ ޖަމާކުރެވޭނެ އިންތިޒާމު ހަމަޖެއްސުމަކީ، ފަންޑަށް އެހީވާން ބޭނުންވާ ފަރާތްތަކަށް ލިބިގެންދިޔަ ވަރަށް ބޮޑު ލުޔެކެވެ.