ސިނަމާލެ ބްރިޖުން ހުޅުމާލެއަށް އަރާ ހަލިމަގުގައި އިއްޔެ ހިނގި އެކްސިޑެންޓާ ގުޅިގެން އެ ކާރު ދުއްވަން އިން ބ. ކަމަދޫ، ހަސަން ރިފާއުގެ ޑްރައިވިން ލައިސެންސް ހިފަހައްޓާފައިވާ ކަމަށް ފުލުހުން މިއަދު ބުނެފި އެވެ.

ފުލުހުން ބުނިގޮތުގައި، އިއްޔެ ހެނދުނު 8:42 ހާއިރު ހިނގި މި ހާދިސާގައި، ކޮންޓްރޯލް ނުވެ ގޮސް ކާރު ޖެހިފައިވަނީ މަގުމަތީގައި ހުރި ސޯލާޕެނަލްތަކުގައެވެ. މި އެކްސިޑެންޓްގެ ސަބަބުން ސޯލާޕެނަލްތަކަށާއި ކާރަށް ބޮޑެތި ގެއްލުންތައް ލިބިފައިވާއިރު، ކާރުގެ ބައިތައް ނެއްޓި އެ ސަރަހައްދަށް ވެއްޓިފައިވެއެވެ. އަދި ޑިއުޓީއާއި ފްރެއިޓް ހިމަނައިގެން ގާތްގަނޑަކަށް 19 މިލިއަނަށް ވުރެ ބޮޑު ލަމްބޯގިނީ ވަނީ މުޅިން ބޭނުން ނުކުރެވޭ ވަރަށް ހަލާކުވެފައެވެ.

Ad by Hajj Corporation

މި ހާދިސާ ހިނގިއިރު ކާރު ދުއްވަން އިނީ ބ. ކަމަދޫ، ހަސަން ރިފާއު ކަމަށާއި، އޭނާއާއެކު ކާރުގައި 13 އަހަރުގެ ކުޑަކުއްޖެއްވެސް އިން ކަމަށް ފުލުހުން މައުލޫމާތު ދީފައިވެއެވެ. މި އެކްސިޑެންޓްގައި ދެ މީހުންނަށްވެސް އެއްވެސް ސީރިއަސް އަނިޔާއެއް ލިބިފައި ނުވި ނަމަވެސް، ޓްރީޓޮޕް ހޮސްޕިޓަލަށް ގެންގޮސް ފަރުވާދިނުމަށްފަހު މިހާރު ވަނީ ދޫކޮށްލާފައެވެ.

މި މައްސަލައާ ގުޅިގެން ތަހުގީގަށް ބޭނުންވާ މައުލޫމާތު އެއްކުރުމަށްފަހު، ކާރުގެ ބައިތައް މިހާރު ވަނީ ވެރިފަރާތާ ހަވާލުކޮށްފައެވެ. ދިވެހި ފުލުހުންގެ ޚިދުމަތުން ދަނީ މި މައްސަލަ އިތުރަށް ތަހުގީގު ކުރަމުންނެވެ.