ބްރެޒިލްގެ ޕަލްމެއިރަސްއަށް ކުޅެމުން އަންނަ އުމުރުން 22 އަހަރުގެ ވިންގާ އެލަން، 40 މިލިއަން ޔޫރޯގެ ޓްރާންސްފާ ފީއަކަށް މެންޗެސްޓާ ސިޓީއަށް ބަދަލުވުމުގެ އެންމެ ފަހުގެ މަރުހަލާތައް ފުރިހަމަކުރުމަށް ބުރާސްފަތި ދުވަހު އިންގްލެންޑަށް ފުރުމަށް ހަމަޖެހިއްޖެއެވެ.

ކުޅިވަރުގެ ޚަބަރުތައް ގެނެސްދޭ މަޝްހޫރު ނޫސްވެރިޔާ ފަބްރީޒިއޯ ރޮމާނޯ ރިޕޯޓްކޮށްފައިވާ ގޮތުގައި، ޒުވާން ވިންގާ ފުރުމުގެ ކުރިން މިއަދުގެ ވަގުތެއްގައި ޕަލްމެއިރަސްގެ ކުޅުންތެރިންނާއި އޮފިޝަލުންނާ ބައްދަލުކޮށް އަލްވަދާއު ކިޔާނެއެވެ. އަދި އިންގްލެންޑަށް ދެވުމާއެކު އޭނާގެ ޓްރާންސްފާގެ އެއްބަސްވުމުގައި ރަސްމީކޮށް ސޮއިކުރާނެ ކަމަށް ވަނީ ބެލެވިފައެވެ.

Ad by Hajj Corporation

ކަނާތު ފަޅިން ކުޅޭ އަދި ވައަތުފައިން ބޯޅަ ކޮންޓްރޯލްކުރާ ހުނަރުވެރި އެލަން އަކީ ޕަލްމެއިރަސްގެ އެކަޑަމީން ކުރިއަރައިގެން އައި ކުޅުންތެރިއެކެވެ. އޭނާ ވަނީ އެ ކްލަބުގެ ސީނިއާ ޓީމަށް ކުޅެދިން 96 މެޗުގައި ނުވަ ލަނޑު ޖަހައި، 12 އެސިސްޓް ފޯރުކޮށްދީ، ކަމްޕިއޮނާޓޯ ޕައުލިސްޓާ މުބާރާތުގެ ތަށި ކާމިޔާބުކުރުމުގައި މުހިންމު ދައުރެއް އަދާކޮށްފައެވެ.

އެކި މަގާމުތަކަށް ކުޅުމުގެ ގާބިލުކަން ލިބިފައިވާ މި ކުޅުންތެރިޔާ ޓީމާ ގުޅުމާއެކު، މެންޗެސްޓާ ސިޓީގެ އެޓޭކިން ލައިނަށް އިތުރު ވަރުގަދަކަމެއް ލިބިގެންދާނެ ކަމަށް ބެލެވެއެވެ.