މޯލްޑިވްސް އިސްލާމިކް ބޭންކް (އެމްއައިބީ) ގެ ޚިދުމަތްތައް ބ. އަތޮޅުގެ އެކި ރަށްތަކުގައި ފުޅާކޮށް، އޭދަފުށީގައި ބްރާންޗެއް އަދި ކެންދޫ، ގޮއިދޫ، އަދި ތުޅާދޫގައި އޭޓީއެމްގެ ޚިދުމަތްތައް ރަސްމީކޮށް ފަށައިފިއެވެ.

މި މަޝްރޫޢުތައް އިފްތިތާހުކޮށްދެއްވައި ވާހަކަފުޅުދެއްކެވީ މިނިސްޓަރ އޮފް ފިނޭންސް އެންޑް ޕަބްލިކް އެންޓަޕްރައިޒަސް ހަސަން ޒަރީރު އެވެ. އޭދަފުށީގައި އެމްއައިބީގެ އައު ބްރާންޗެއް ހުޅުވުމާއެކު، ޝަރީޢާ ހުއްދަ ބޭންކިންގ ޚިދުމަތްތައް ލިބި، ވިޔަފާރިވެރިންނާއި މަސްވެރިންގެ އިތުރުން ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކަށް ފައިނޭންސިން ހޯދައި ވިޔަފާރި ފުޅާކުރުމުގެ ފުރުސަތު ވަނީ ތަނަވަސްވެފަ އެވެ. މިއީ ރާއްޖޭގެ ހުރިހާ ހިސާބަކަށް ހަމަހަމަ ގޮތެއްގައި މާލީ ޚިދުމަތްތައް ފޯރުކޮށްދިނުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ގެންގުޅޭ ސިޔާސަތުގެ ދަށުން އެޅި މުހިންމު ފިޔަވަޅެކެވެ.

Ad by Hajj Corporation

މީގެ އިތުރުން، ބ. ކެންދޫ، ގޮއިދޫ، އަދި ތުޅާދޫގައި ޤާއިމުކުރެވުނު އޭޓީއެމް ޚިދުމަތްތަކާ އެކު، އަތޮޅުގެ ރައްޔިތުންނަށް އާމްދަނީ ޖަމާކުރުމާއި ފައިސާ ނެގުމަށް އަތޮޅުވެރިކަން ކުރާ ރަށަށް ނުވަތަ އެހެން ރަށަކަށް ދަތުރުކުރަންޖެހޭ ދަތިކަމަށް ވަނީ ޙައްލެއް ލިބިފައެވެ. އެމްއައިބީގެ 62 ވަނަ އޭޓީއެމްގެ ގޮތުގައި ގޮއިދޫގައި ޚިދުމަތް ފެށިއިރު، މިއިން ކޮންމެ ރަށެއްގައި ފުޅާވަމުން އަންނަ ގެސްޓްހައުސް ވިޔަފާރިއަށާއި މަސްވެރިކަމުގެ އިތުރުން ތުޅާދޫގެ މަޝްހޫރު ލިޔެލާޖެހުމުގެ އަތްތެރި މަސައްކަތްތަކަށް ބޮޑެތި ލުއިފަސޭހަތަކާއި ކުރިއެރުން ލިބިގެންދާނެކަން މިނިސްޓަރ ފާހަގަކުރެއްވިއެވެ.

މިދިޔަ އަހަރު ޑިސެމްބަރު މަހު އިފްތިތާހުކުރި 'ނޭޝަނަލް ފައިނޭންޝަލް އިންކްލޫޝަން ސްޓްރެޓެޖީ (2026–2030)' ގެ ދަށުން، މާލީ ނިޒާމުގެ ބޭރުގައި ތިބި ފަރާތްތަކަށް ޚިދުމަތްތައް ފޯރުކޮށްދިނުމާއި، މާލީ ހޭލުންތެރިކަން އިތުރުކުރުމަށް ސަރުކާރުން އެމްއައިބީ ފަދަ މާލީ މުއައްސަސާތަކާ ގުޅިގެން މަސައްކަތްކުރަމުން ގެންދާނެ ކަމަށް މިނިސްޓަރ ވިދާޅުވިއެވެ.