ދާހިލީ ސަލާމަތާއި ފަންނިއްޔާތާ ބެހޭ ވުޒާރާގެ ނަމުގައި، ބޭންކް އޮފް މޯލްޑިވްސް (ބީއެމްއެލް)ގެ ސީއީއޯ މުޙައްމަދު ޝަރީފަށް ރައްދުކޮށް މީސްމީޑިއާގައި ދައުރުވަމުންދާ ސިޓީއަކީ މުޅިން ވެސް އަސްލެއް ނޫން، ސައްޚަ ނޫން ލިޔުމެއް ކަމަށް ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވަޒީރު އަލީ އިހުސާން ވިދާޅުވެއްޖެއެވެ.

މި ސިޓީގައި ބުނެފައިވަނީ ބޭރުފައިސާގެ ގާނޫނުގެ ދަށުން ތަހުގީގީ ބޭނުމަށް، ބޭރުފައިސާގެ ވިޔަފާރިކުރާ ފަރާތްތަކުގެ އެކައުންޓްތަކުގެ މައުލޫމާތާއި ލިސްޓެއް ހިއްސާކޮށްދިނުމަށް އެދިފައިވާ ކަމަށެވެ. ނަމަވެސް މިކަން ދޮގުކުރައްވަމުން ވަޒީރު ވިދާޅުވީ ދާހިލީ ވުޒާރާއަކީ ސީދާ ތަހުގީގު ހިންގާ އިދާރާއަކަށް ނުވާތީ، އެފަދަ އެއްވެސް ލިޔުމެއް ބޭންކަކަށް ނުވަތަ އެހެންވެސް އިދާރާއަކަށް ފޮނުވާފައި ނުވާނެ ކަމަށެވެ. އަދި ދައުލަތުގެ އިދާރާތަކުގެ ނަމުގައި މިފަދަ ޒިންމާދާރުކަން ކުޑަ އަމަލުތައް ނުހިންގުމަށް އެމަނިކުފާނު ވަނީ އެންމެހާ ފަރާތްތަކަށް އިލްތިމާސްކުރައްވާފައެވެ.

Ad by Hajj Corporation

މި ކަމާ ގުޅިގެން ބީއެމްއެލްއިން ވެސްވަނީ އެ ސިޓީއަކީ ސައްހަ ސިޓީއެއް ނޫންކަން ކަށަވަރުކޮށްދީފައެވެ. އެ ބޭންކުން ބުނިގޮތުގައި ކަސްޓަމަރުންގެ ބޭންކިންގ މައުލޫމާތު ބޭންކުން ހަމައެކަނި ފޯރުކޮށްދޭނީ ބޭންކިންގ ގާނޫނާ އެއްގޮތްވާ ގޮތުގެ މަތިން ކޯޓު އަމުރެއްގެ ދަށުންނާއި، އަދި ރަސްމީ ތަހުގީގީ އިދާރާތަކުން ލިޔުމަކުން އެދި ހުށه‌ހެޅުމުން އެކަންޏެވެ.

މިފަދަ ދޮގު ލިޔުންތައް ދައުރުވަމުންދާއިރު، ބޭރުފައިސާގެ އާ ޤާނޫނަށް ގެނެވުނު އިސްލާހުތަކާއެކު މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ކަނޑައަޅާފައިވާ ރޭޓަށްވުރެ މަތިން ބޭރުފައިސާގެ ވިޔަފާރިކުރުމާއި ކަޅު ބާޒާރުގައި ބޭރުފައިސާގެ މުއާމަލާތް ކުރުމަކީ ގާނޫނީ ކުށެކެވެ. ސަރުކާރުން ވަނީ މިފަދަ ޤާނޫނުތައް ތަންފީޒުކޮށް، ގާނޫނާ ހިލާފަށް ބޭރުފައިސާގެ މުއާމަލާތްކުރާ ފަރާތްތައް ހުއްޓުވުމަށް އަޅަންޖެހޭ ފިޔަވަޅުތައް އަޅަމުންދާނެ ކަމަށް ހާމަކޮށްފައެވެ.