ދިރިއުޅޭ ގޭގެ ކޮޓަރިން މަސްތުވާތަކެތި ކަމަށް ޝައްކުކުރެވޭ ބައެއް ތަކެތި ފެނުނު މައްސަލައެއްގައި ނ.ލަންދޫން މީހަކު ހައްޔަރުކޮށްފިއެވެ.

Ad by Hajj Corporation

މި މައްސަލައިގައި ހައްޔަރުކޮށްފައިވަނީ، ނ.ލަންދޫ ޝިފާ، ޙުސައިން ސަލާމް އަޙްމަދު މުމްތާޒު (24 އަހަރު) އެވެ. މީނާ ދިރިއުޅޭ ގެ އިއްޔެގެ ވަގުތެއްގައި ފުލުހުން ބަލާފާސްކޮށްފައިވަނީ ކޯޓު އަމުރެއްގެ ދަށުންނެވެ. އެގޮތުން މި ގެ ބަލާފާސްކުރުމުގެ ތެރޭގައި މަސްތުވާތަކެތި ކަމަށް ޝައްކުކުރެވޭ އެއްޗެއް ހުރި 3 ކަރުދާސްކޮޅާއި 3 ރަބަރު ޕެކެޓް ވަނީ ފެނިފައެވެ.

މީނާ އަކީ ލަންދޫގައި ފުޅާ ދާއިރާއެއްގައި މަސްތުވާތަކެތީގެ ވިޔަފާރި ކުރަމުން އަންނަ މީހެއް ކަމަށް އެރަށު މީހުން ތުޙުމަތު ކުރެއެވެ. މި މައްސަލައާ ގުޅިގެން ފުލުހުންގެ ބެލުމުގެ ދަށަށް މީނާ ގެންދިޔަ އިރު، މީނާ ހުރީ މީނާގެ މައްޗަށް އުފުލުނު ދެ ދައުވާއަކާ ގުޅިގެން ގޭ ބަންދުކޮށްފައެވެ.

މި މައްސަލައާ ގުޅިގެން މީނާގެ ބަންދާމެދު ގޮތެއް ނިންމުމަށް ކޯޓަަށް ހާޟިރުކުރުމުން މީނާ 30 ދުވަހުގެ މުއްދަތަށް ކަސްޓޯޑިއަލް ޖަލެއްގައި ބަންދުކުރުމަށް ވަނީ އަމުރުކޮށްފައެވެ.