އެމްޑީޕީގެ ރިޔާސީ ޓިކެޓް ހޯދުމަށް ކެމްޕޭން ކުރަށްވަމުން ގެންދަވާ އެ ޕާޓީގެ ކުރީގެ ރައީސް ޢަބުދުﷲ ޝާހިދު ކެމްޕޭނަށް ކުރާ ދަތުރުތަކުގައި މަރުހަބާ ކިޔުމަށާއި ޝާހިދުގެ ކެމްޕޭން ހަރަކާތްތަކުގައި އެމްޑީޕީގެ މެމްބަރު ބައިވެރިނުވާން އަންގާ މައްސަލަ ހޫނުވެއްޖެއެވެ.

ޝާހިދުގެ ކެމްޕޭންގައި އިސްކޮށް ހަރަކާތްތެރިވާ މަޖިލީހުގެ ކުރީގެ މެމްބަރަކު ވިދާޅުވީ ޝާހިދުގެ ކެމްޕޭނަށް ދަތިކުރުމަށް އެމްޑީޕީގެ ބާރު ގަދަ ފެކްޝަންތަކުން މަސައްކަތްކުރަމުންދާ ކަމަށެވެ.

Ad by Hajj Corporation

''ސީދާ ސޯލިހް ފެކްޝަނާއި ނަޝީދާއި ފައްޔާޒު ފެކްޝަން ވާހަކަ މި ދެންނެވީ އިނގޭ، އަޅުގަނޑުމެން ފަހަތަކަށް ނުޖެއްސޭނެ އިނގޭ، އެމީހުންނަށް ވެސް މިކަން އަންގާލަންވާނެ އިނގޭ'' އިސްކޮޅުން ދިގު އާންމުކޮށް ބޯ ބާލައިގެން އުޅުއްވާ އެ މެމްބަރު އުތުރުގެ ރަށެއްގައި ހުންނަވާ ވިދާޅުވިއެވެ.

އޭނާ ވިދާޅުވީ، ''އިރާލާފައިވެސް ޝަހިދަށް ޓިކެޓް ހޯދައިދޭނެ'' ކަމަށާއި، ''ނަޝީދާއި، ފައްޔާޒު އަދި ސޯލިހް މެން ޖެހޭނީ ތެޅިތެޅި ތިބެން'' ކަމަށެވެ. އޭނާ ވިދާޅުވީ، ޝާހިދުގެ ކެމްޕޭނަށް އެހެން ފެކްޝަންތަކުން ދަތިކުރާތީ ޝާހިދު ހުންނެވީ ވަރަށް ނުރުހުންވެފައިކަމަށާއި، އައްޑޫ ކެމްޕޭނާއި ޚިލާފަށް އުތުރު ކެމްޕޭނަށް ޝާހިދުގެ ''ޖީބު ހުޅުވާލާފައިވާ'' ކަމަށެވެ. އަދި އެކަން އުތުރު ކެމްޕޭނުން ފެންނާނެކަމަށް އޭނާ ވިދާޅުވިއެވެ.

ބެލެވޭގޮތުގައި އޭނާ އެ ސިފަކުރެއްވީ ކުޅުދުއްފުށީ ސިޓީން ޝާހިދުގެ ކެމްޕޭނަށް މީހުން ނެރުނީ އިނާޔަތްދީގެން ކަމަށެވެ.

''ޝާހިދު ރިސީވް ކުރަން ނުދާން އެބަ އަންގާ، ސަލާން ނުކުރަން އެބަ އަންގާ، އެކުގައި ފޮޓޯއެއް ނެގިނުދޭން އެބަ އަންގާ، ވާހަކަދައްކާލަން މަޑުނުކުރަން އެބައަންގާ، ކެމްޕޭން ހަރަކާތަކުން ފެނިގެން ނުވާނެކަމަށް އެބައަންގާ، މިދެން ކިހާބޮޑު ނޮރޮހޮއްޕާނެއް'' އޭނާ އަމުނައިލިއެވެ.

އޭނާގެ މި ވާހަކަތަކުން އެމްޑީޕީގެ އެތެރޭގައި އޮތް ހޫނު މިހާރު ވަނީ އާންމު މެމްބަރުންނާއި ހަމައަށް ވާސިލްވެފައިކަން ހެކިކޮށްދެއެވެ.

ޝާހިދު މިވަގުތު ހުންނެވީ ކެމްޕޭނަށް ކުޅުދުއްފުށީގައެވެ.