ފޯޅަވަހި ނުވަތަ ޗާގޯސް ޖަޒީރާތަކުގެ ސިޔާދަތާ ގުޅޭ މައްސަލަތަކުގައި ރަސްމީކޮށް މަޝްވަރާކުރެއްވުމަށް އިނގިރޭސިވިލާތުގެ ބޮޑުވަޒީރަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދައުވަތު އަރުވައިފިއެވެ.

ރައީސުލްޖުމްހޫރިއްޔާ މި ދައުވަތު އެރުވީ އިނގިރޭސިވިލާތުގެ ބޮޑުވަޒީރު ދަ ރައިޓް އޮނަރަބަލް އެންޑްރޫ ބަރންހަމް އަށް މިއަދު ފޮނުއްވި ސިޓީފުޅެއްގައެވެ. މި ސިޓީފުޅުގައި، ޗާގޯސް ޖަޒީރާތައް މޮރިޝަސްއާ ހަވާލުކުރުމަށް އިނގިރޭސިވިލާތުން ނިންމާފައިވާ ނިންމުމާ މެދު ދިވެހިރާއްޖޭގެ ކަންބޮޑުވުންތައް ރައީސް ވަނީ ހިއްސާކުރައްވާފައެވެ.

Ad by Hajj Corporation

ރައީސުލްޖުމްހޫރިއްޔާގެ ސިޓީފުޅުގައި ދިވެހިރާއްޖެއާއި ޗާގޯސްއާ ދެމެދު އޮތް ތާރީޚީ އަދި ސަގާފީ ގުޅުންތަކުގެ އިތުރުން، އެ ސަރަހައްދުގެ ކަނޑުގެ ދިރުންތައް ހިމާޔަތްކުރުމަށާއި ސައިންޓިފިކް ދިރާސާތަކަށް ރާއްޖެއިން ޒަމާނުއްސުރެ ދެމުންދާ އެއްބާރުލުން ފާހަގަކުރެއްވިއެވެ. އަދި ދިވެހި ދައުލަތާއި ރައްޔިތުންގެ ހައްގުތައް ރައްކާތެރިކުރުމާއެކު، ޗާގޯސްގެ ކަންކަމުގައި އިނގިރޭސިވިލާތާއެކު ބިނާކުރަނިވި ގުޅުމެއް ބޭއްވުމަށް ރާއްޖެއިން އަބަދުވެސް ތައްޔާރަށް އޮތްކަމުގެ ޔަގީންކަން ރައީސް ވަނީ ދެއްވާފައެވެ.

މީގެއިތުރުން، ޗާގޯސްގެ ސިޔާދަތާ ގުޅޭ މައްސަލަތަކުގައި އިނގިރޭސިވިލާތާއި ދިވެހިރާއްޖެއާ ދެމެދު މާނަވީ މަޝްވަރާތަކެއް ކުރިއަށް ގެންދިއުމުގެ މުހިންމުކަން ރައީސް ޑރ. މުޢިއްޒު ތަކުރާރުކުރެއްވިއެވެ. އަދި ދުނިޔޭގެ މަސްރަހު ނުތަނަވަސްވެފައިވާ މި ދަނޑިވަޅުގައި، ދެ ގައުމުގެ ދެމެދުގައި ގުޅުން ބަދަހިކުރުމަކީ އިންޑިއާ ކަނޑުގެ ހަމަޖެހުމާއި ސަލާމަތަށް މަގުފަހިވެގެންދާނެ ކަމެއް ކަމަށް އުންމީދުކުރައްވާ ކަމަށްވެސް ރައީސް ވިދާޅުވިއެވެ.

ރައީސް ގެންދަވަނީ ފޯޅަވައްސަކީ ރާއްޖޭގެ ތަނެއްކަމުގައި ވަކާލާތު ކުރަށްވަމުންކަން ފާހަގަކޮށްލެވެއެވެ.