ޔުއެފާ ޗެމްޕިއަންސް ލީގުގެ ފުރަތަމަ މެޗުގައި އާލިން ހާލަންޑް ކާމިޔާބުކޮށްދިން ދެ ލަނޑުން ޕޯޓޯގެ މައްޗަށް 2-0 ގެ ނަތީޖާއަކުން މެންޗެސްޓާ ސިޓީން ކުރިހޯދައިފިއެވެ. ޕޯޓޯގެ އެސްޓާޑިއޯ ޑޯ ޑްރަގާއޯގައި ކުޅުނު މި މެޗު ކާމިޔާބުކޮށް، ސިޓީގެ އައު ކޯޗު އެންޒޯ މަރެސްކާގެ އިރުޝާދުގެ ދަށުން އެ ޓީމުން ދަމަހައްޓަމުން އަންނަ ސައްތައިން ސައްތަ ރެކޯޑު ވަނީ ދަމަހައްޓާފައެވެ.

މެޗުގެ ފުރަތަމަ ހާފުގައި ސިޓީން ގިނަ ހަމަލާތަކެއް އުފެއްދި ނަމަވެސް ޕޯޓޯގެ ގޯލްކީޕަރު ޑިއޯގޯ ކޮސްޓާ ވަނީ ހާލަންޑާއި ރަޔާން ޗާކީ އަދި ސެމެންޔޯ ފޮނުވާލި ނުރައްކާތެރި ހަމަލާތައް މަތަކޮށްފައެވެ. ނަމަވެސް ދެވަނަ ހާފު ފެށިގެން ދެވަނަ މިނެޓުގައި އެންޒޯ ފެނާންޑޭޒް ނަގައިދިން ހުރަހަކުން ހާލަންޑް ވަނީ ބޮލުން ގޯލުގެ ތެރެއަށް ބޯޅަ ވައްދާލައި ސިޓީއަށް ލީޑު ނަގައިދީފައެވެ. އަދި މެޗުގެ އިތުރު ވަގުތުގެ ފުރަތަމަ މިނެޓުގައި އައިޓް-ނޫރީ ތަނަވަސްކޮށްދިން ފުރުސަތަކުން ހާލަންޑް ވަނީ ސިޓީގެ ދެވަނަ ލަނޑު ކާމިޔާބުކޮށްދީ މޮޅު ކަށަވަރުކޮށްދީފައެވެ.

Ad by Hajj Corporation

މި މެޗުގައި ޖެހި ދެ ލަނޑާއެކު ހާލަންޑް ވަނީ ޗެމްޕިއަންސް ލީގުގައި ކާމިޔާބުކުރި ލަނޑުގެ އަދަދު 59 އަށް އަރުވައި، މުބާރާތުގެ ތާރީޚުގައި 7 ވަނައަށް އެންމެ ގިނަ ލަނޑު ޖެހި ކުޅުންތެރިޔާގެ ޝަރަފު ހޯދާފައެވެ. މީގެއިތުރުން ސިޓީގެ ޖާޒީގައި މި މުބާރާތުގައި 36 ލަނޑު ހަމަކޮށް، ކްލަބުގެ ރެކޯޑު އަދަދަކަށް ލަނޑު ޖަހާފައިވާ ސާޖިއޯ އަގުއޭރޯގެ ރެކޯޑާ ވެސް އޭނާ ވަނީ ހަމަކޮށްފައެވެ.

މުޅި މެޗުގައި ޕޯޓޯއަށް ސިޓީގެ ގޯލަށް އަމާޒުކޮށް އެންމެ ހަމަލާއެއްވެސް ފޮނުވާނުލެވުނުއިރު، ސިޓީގެ މެދުތެރޭގައި ޒުވާން ކުޅުންތެރިޔާ އަޔޫބް ބުއައްދީ ވަނީ މޮޅު ކުޅުމެއް ދައްކާފައެވެ. ސިޓީން ދެން އެންމެ އަވަހަށް ނުކުންނާނީ ޕްރިމިއާ ލީގުގައި މެންޗެސްޓާ ޔުނައިޓެޑާ ދެކޮޅަށް ކުޅޭ ޑާބީ މެޗަށެވެ.