ހުކުރު ދުވަހުގެ ރޭ ކުޅުނު ވެސްޓް ލަންޑަން ޑާބީގައި ޗެލްސީގެ މައްޗަށް 3-0 ގެ ފުރިހަމަ ކާމިޔާބީއެއް ހޯދައި، ބްރެންޓްފޯޑުން ޕްރިމިއާ ލީގުގެ ތާވަލުގެ ތިންވަނައަށް ޖެހިލައިފިއެވެ. ކީތު އެންޑްރޫސްގެ އިރުޝާދުގެ ދަށުން ކުޅެމުން އަންނަ ބްރެންޓްފޯޑަށް މި މެޗުގައި ލަނޑުތައް ކާމިޔާބުކޮށްދިނީ ޖޭޑަން އެންތަނީ، އިގޯ ތިއާގޯ އަދި ފަބިއޯ ކަވަލިއޯއެވެ.

މެޗުގެ ފުރަތަމަ ހާފުގައި ދެ ޓީމަށް ވެސް ލަނޑު ޖަހާނެ މާ ގިނަ ފުރުސަތުތަކެއް ތަނަވަސްކުރެވިފައެއް ނުވެއެވެ. ނަމަވެސް، ދެވަނަ ހާފު ފެށިގެން 60 ވަނަ މިނެޓުގައި މިކޭލް ޑަމްސްގާޑް ނެގި ކޯނަރަކުން ޔަނިކް ޝޫސްޓާ ބޮލުން ދައްކާލި ބޯޅަ، ހުސްކޮށްހުރެ ގޯލުގެ ތެރެއަށް ފޮނުވާލައިގެން އެންތަނީ ވަނީ ބްރެންޓްފޯޑަށް ލީޑު ނަގައިދީފައެވެ. އޭގެ ފަހުން ޗެލްސީން ނަތީޖާ ހަމަހަމަކުރަން ކުރި މަސައްކަތްތައް ކާމިޔާބުނުވެ، މެޗުގެ 83 ވަނަ މިނެޓުގައި ތިއާގޯ ވަނީ ބްރެންޓްފޯޑުގެ ދެވަނަ ލަނޑު ޖަހައިދީފައެވެ. އަދި އިތުރު ވަގުތުގެ ތެރޭގައި ކަވަލިއޯ ވަނީ އެ ޓީމުގެ ތިންވަނަ ލަނޑު ކާމިޔާބުކޮށްދީފައެވެ.

Ad by Hajj Corporation

މި ނަތީޖާއާއެކު މި ސީޒަނުގެ ޕްރިމިއާ ލީގުގައި ބްރެންޓްފޯޑް އަދިވެސް ބަލިނުވެ ދެމިއޮތްއިރު، އެ ޓީމުން ވަނީ ދެ މެޗުން މޮޅުވެ ތިން މެޗުން އެއްވަރުވެފައެވެ. އަނެއްކޮޅުން، ޒަބީ އަލޮންސޯގެ ޗެލްސީ އެންމެ ފަހުން ކުޅުނު ތިން މެޗުން ވެސް މޮޅެއް ލިބިފައިނުވާއިރު، އެ ޓީމު މިހާރު އޮތީ ތާވަލުގެ ހަތްވަނައިގައެވެ. އަދި ޗެލްސީ މިހާރު ވެފައިވަނީ މިވަގުތު ލީގުގައި އެންމެ ދިފާއީ ރެކޯޑު ދަށް ޓީމަށެވެ.