އަމީނީ މަގު މަރާމާތުކުރުމުގެ މަސައްކަތުގެ ތެރެއިން މިހާރު މަސައްކަތް ފަށާފައިވާ ފުރަތަމަ ސެގްމަންޓުގައި ތާރުގެ ދެވަނަ ފަށަލަ އެޅުމުގެ މަސައްކަތް ފަށައިފިއެވެ.

އަމީނީ މަގުގެ މަރާމާތު ކުރަން ފަށާފައިވާ ސަރަހައްދުގެ ފުރަތަމަ ސެގްމަންޓުގައި ތާރު އެޅުމުގެ މަސައްކަތް ފެށީ މިދިޔަ ހޮނިހިރު ދުވަހުއެވެ. އަދި މިއަދު ދެވަނަ ތާރުގެ ދެވަނަ ފަށަލަ އެޅުމުގެ މަސައްކަތް ފަށާފައިވާ ކަމަށް އެމްޓީސީސީން ވަނީ ބުނެފައެވެ.

އެ ކުންފުނިން ބުނީ، ތާރު އެޅުމުގެ މަސައްކަތް ހަފުތާއެއްގެ ތެރޭގައި އެއްކޮށް ނިންމާލެވޭނެކަމަށާއި،އެގޮތުން ތާރުގެ ދެވަނަ ފަށަލަ އެޅުމަށްފަހު މި ހަފުތާގެ ތެރޭގައި މަގުގެ ނިޝާންތައް ކުރެހުންފަދަ އެންމެ ފަހުގެ މަސައްކަތްތައް ތާވަލުކޮށްފައިވާ ކަމަށް އެ ކުންފުނިން ބުނެފައިވެއެވެ.

Ad by Hajj Corporation

މިއީ މަގުގެ ފެންވަރު ރަނގަޅުކޮށް އާންމުންނަށް ދަތުރުފަތުރުކުރުމުގައި ލުއިފަސޭހަކޮށްދިނުމަށް ކުރިއަށްގެންދާ މުހިންމު މަސައްކަތެކެވެ. މި މަސައްކަތް ކުރުމަށްޓަކައި ބަންދުކޮށްފައިވަނީ ދިވެހިރާއްޖޭގެ އަޑުގެ އިމާރާތުން ފެށިގެން ދަރުމަވަންތަ ހޮސްޕިޓަލާ ހިސާބަށް އޮތް ސަރަހައްދެވެ. މި ސަރަހައްދު އާންމު ދަތުރުފަތުރަށް ބަންދުކޮށްފައިވަނީ މިދިޔަ ޖޫން މަހުގެ ފަހުކޮޅުގައެވެ.

ފުރަތަމަ ސެގްމަންޓްގެ މަސައްކަތް ނިންމައި އާންމުންނަށް ހުޅުވާލުމަށްފަހު، ދެން ކުރިއަށްދާނީ ސެގްމަންޓް 2 ގައި ހިމެނޭ ދިވެހިރާއްޖޭގެ އަޑުން ފެށިގެން ގިޔާސުއްދީން ސްކޫލާ ހަމައަށް އޮންނަ ސަރަހައްދުގެ މަސައްކަތެވެ.

އަދި މުޅި މި މަސައްކަތް އަންނަ ނޮވެންބަރު މަހުގެ ތެރޭގައި ނިންމާލުމަށް ވަނީ އަމާޒުހިފާފައެވެ. މީގެއިތުރުން، އަމީނީ މަގު މަރާމާތު ކުރުމުގެ އިތުރުން ބޮޑުތަކުރުފާނު މަގުގެ ތާރުއަޅާފައިވާ ސަރަޙައްދުތަކުން ހަލާކުވެފައި ހުރި ތަންތަން މަރާމާތުކުރުމަށްވެސް ވަނީ ހަމަޖެހިފައެވެ.