މާލޭ، އަމީނީ މަގު އަލުން މަރާމާތު ކުރުމުގެ މަސައްކަތުގެ ދަށުން ސެގްމެންޓް 3 ގައި ތާރުއެޅުމުގެ މަސައްކަތް މި ހަފްތާގައި ފެށޭނެ ކަމަށް އެމްޓީސީސީ އިން ބުނެފިއެވެ.

އެމްޓީސީސީން މިއަދު ބުނީ މި މަޝްރޫއުގެ ދަށުން ސެގްމެންޓް 3 ގައި އޭބީސީ ފަށަލަ އެޅުމުގެ މަސައްކަތް ހޯމަ ދުވަހު ނިމޭނެ ކަމަށް ލަފާ ކުރެވޭ ކަމަށެވެ. އަދި އޭގެ ފަހުން މި ހަފްތާގެ ތެރޭގައި ތާރު އެޅުމުގެ މަސައްކަތް ފެށުމަށް ހަމަޖެހިފައިވާ ކަމަށްވެސް އެމްޓީސީސީން ވަނީ ބުނެފައެވެ.

Ad by Hajj Corporation

އެމްޓީސީސީން ލަފާކޮށްފައިވާ ގޮތުގައި ތާރުއެޅުމަށްފަހު މަގުގެ ނިޝާންތައް ކުރެހުމުގެ މަސައްކަތް އަންނަ ހަފްތާގައި ފެށޭނެއެވެ.

އަމީނީ މަގު މަރާމަތުކުރުމުގެ މަސައްކަތް އެމްޓީސީސީއާ ހަވާލުކޮށްފައިވަނީ ޖޫން މަހުގެ 15 ވަނަ ދުވަހުއެވެ.

އެމްޓީސީސީން ނިމިދިޔަ ހަފްތާ ވަނީ މި މަޝްރޫއުގެ ދަށުން ސެގްމެންޓް 1 އަދި 2 ގައި ތާރުއަޅައި އާންމުންނަށް މިހާރު ވަނީ ހުޅުވާލާފައެވެ.

މުޅި މި މަސައްކަތް އަންނަ ނޮވެންބަރު މަހުގެ ތެރޭގައި ނިންމާލުމަކީ އެމްޓީސީސީގެ އަމާޒެކެވެ.. މީގެއިތުރުން، އަމީނީ މަގު މަރާމާތު ކުރުމުގެ އިތުރުން ބޮޑުތަކުރުފާނު މަގުގެ ތާރުއަޅާފައިވާ ސަރަޙައްދުތަކުން ހަލާކުވެފައި ހުރި ތަންތަން މަރާމާތުކުރުމަށްވެސް ވަނީ ހަމަޖެހިފައެވެ.