އަމީނީ މަގުގައި މަރާމަތުކުރި ސަރަޙައްދު އާންމު ދަތުރުފަތުރަށް މިހާރު ހުޅުވާލާފައިވާކަމަށް ބިނާރާއި ގެދޮރުވެރިކަމާ ޢުމްރާނީ ތަރައްޤީއާ ބެހޭ ވުޒާރާއިން ވިދާޅުވެއްޖެއެވެ.

މި މަސައްކަތް އެމްޓީސީސީއާ ހަވާލުކޮށްފައިވަނީ މިދިޔަ ޖޫން މަހުގެ 15 ވަނަ ދުވަހުއެވެ.

Ad by Hajj Corporation

އަމީނީ މަގުގައި ހަލާކުވެފައިވާ ސަރަހައްދު މަރާމާތުކުރުމުގެ މަސައްކަތުގެ ތެރެއިން ފުރަތަމަ ނިންމާފައިވަނީ ދެ ސެގްމަންޓެއްގެ މަސައްކަތެވެ. އެއީ ސެގްމަންޓް 1 ގެ ގޮތުގައި ހިމެނޭ ދިވެހިރާއްޖޭގެ އަޑުން ފެށިގެން ދަރުމަވަންތަ ހޮސްޕިޓަލާ ހަމައަށް އޮތް ސަރަޙައްދާއި، ސެގްމަންޓް 2 ގެ ގޮތުގައި ހިމެނޭ ދިވެހިރާއްޖޭގެ އަޑު ކުރިމަތިން އޮންނަ ހަތަރުއަނގޮޅި ކަންމައްޗެވެ. ސެގްމަންޓު 1 ގެ ދަށުން 2,794.062 އަކަމީޓަރުގެ ސަރަޙައްދެއްގައި ކުރިން އަޅާފައިވާ އެގްރިކޭޓް ބޭސް ކޯސް (އޭބީސީ) އަދި ތާރު ނެގުމަށްފަހު އަލުން ސަބްގްރޭޑް، ސަބްބޭސް، އޭބީސީ އަދި ތާރު ވަނީ އަޅާފައެވެ. އަދި ސެގްމަންޓް 2 ގެ ދަށުން 133.64 އަކަމީޓަރުގެ ސަރަޙައްދެއްގައި ކުރިން އަޅާފައިވާ ތާރު ނެގުމަށްފަހު އޭބީސީ އާއި ތާރު އެޅުމުގެ މަސައްކަތް ވަނީ ނިންމާފައެވެ.

އަމީނީ މަގުގެ މާފަންނާވީ ފަޅި މަރާމާތު ކުރުމުގެ މަސައްކަތް ފެށީ އެ ސަރަޙައްދުގެ ތާރުގަނޑު ވަރަށް ބޮޑަށް ހަލާކުވެ ވަޅުގަނޑުތައް ހެދި، އުޅަނދުތައް ދުއްވުމަށް ބޮޑެތި ދަތިތަކެއް ކުރިމަތިވަމުން ދިޔުމާ ގުޅިގެންނެވެ. މިއީ ބަސް ދަތުރުތައް ކުރުމުގެ އިތުރުން ގިނަ އަދަދަކަށް ބަރު އުޅަނދުތައްވެސް ބޭނުންކުރާ ސަރަޙައްދެކެވެ.

ދެން ފެށުމަށް ހަމަޖެހިފައިވަނީ ސެގްމަންޓް 3 ގެ މަސައްކަތެވެ. އެއީ އިއްޒުއްދީން މަގާ ހިސާބުން ފެށިގެން ކޯރުކެނޑި ހިނގުމާ ހަމައަށް އޮންނަ ސަރަޙައްދެވެ. އެމްޓީސީސީން ވިދާޅުވީ، ސެގްމަންޓު 3 ގެ ދަށުން 1,924.77 އަކަމީޓަރުގެ ސަރަޙައްދެއްގައި ކުރިން އަޅާފައިވާ ތާރު ނެގުމަށްފަހު އަލުން އޭބީސީއާއި ތާރުއެޅުމާއި، މަގުމަތީގެ ނިޝާންތައް ކުރެހުމުގެ މަސައްކަތް ކުރިއަށްދާނެ ކަމަށެވެ. އަދި ކޯރުކެނޑި ހިނގުމުން ފެށިގެން ޣިޔާސުއްދީން އިންޓަރނޭޝަނަލް ސްކޫލާ ހަމައަށް ހިމެނޭ ސެގްމަންޓް 4 ގެ މަސައްކަތުގެ ދަށުން 1,148.91 އަކަމީޓަރުގެ ސަރަޙައްދެއްގައި ކުރީގެ ތާރު ނަގައި، އޭބީސީ އާއި ތާރުއެޅުމުގެ އިތުރުން ނިޝާންތައް ކުރެހުމުގެ މަސައްކަތް ކުރިއަށްގެންދާނެއެވެ.

އާދީއްތަ ދުވަހު ސެގްމަންޓް 3 ގެ މަސައްކަތް ފެށުމަށް ހަމަޖެހިފައިވާތީ، މިރޭ ދަންވަރު 12:00 އިން ފެށިގެން އެ ސަރަހައްދުގެ ޓްރެފިކް ފްލޯއަށް ބަދަލު ގެންނަން ފުލުހުން ވަނީ ނިންމާފައެވެ. އަދި މަގު މަރާމާތުކުރާ ސަރަހައްދުގައި ޕާކްކޮށްފައިވާ އުޅަނދުތައް ނެގުމަށްވެސް ފުލުހުން ވަނީ އަންގާފައެވެ.

މާލޭގެ މަގުތައް ޒަމާނީ ފެންވަރަށް ތަރައްޤީކުރުމުގެ މަސައްކަތުގެ ތެރެއިން، މާލޭގެ ހުޅަނގުކޮޅުން ބޭރު މަގު ތަރައްޤީކުރުމުގެ މަޝްރޫޢު ފެށުމަށްވެސް މިހާރު ވަނީ ތައްޔާރުވެފައެވެ. އެގޮތުން ވެސްޓް ޕާކް ސަރަޙައްދުން ބައެއް ފެން ހިންދާ ނިޒާމުގެ މަސައްކަތަށް މިހާރު ވަނީ ބަންދުކޮށްފައެވެ. ބޮޑުތަކުރުފާނު މަގު ތާރުއަޅައިގެން ތަރައްޤީކުރުމުގެ މަޝްރޫޢުގެ ދަށުން ހެންވޭރު ފެރީ ޓާމިނަލުން ފެށިގެން ނޯތް ހާބަރާ ހަމައަށް އޮތް ސަރަޙައްދުގެ މަސައްކަތް މިހާރު މުޅިން ނިމިފައިވާއިރު، އޭގެ ސަބަބުން އެ ސަރަޙައްދުގެ ތޮއްޖެހުމާއި ދަތުރުފަތުރަށް ވަނީ ބޮޑު ލުޔެއް ލިބިފައެވެ.