ބޮޑުތަކުރުފާނު މަގު ތަރައްޤީކުރުމުގެ މަޝްރޫޢުގެ 3 ވަނަ ފިޔަވަހީގެ ޢަމަލީ މަސައްކަތް ރަސްމީކޮށް ފަށައިފިއެވެ. މި މަސައްކަތް ކުރިއަށް ގެންދަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިންނެވެ.

މި މަޝްރޫޢުގެ އަމަލީ މަސައްކަތް ފަށާފައިވަނީ އައިޖީއެމް ހޮސްޕިޓަލް ސަރަހައްދުންނެވެ. އެމްޓީސީސީން މަޢުލޫމާތު ދެއްވި ގޮތުގައި، މި ފިޔަވަހީގެ ދަށުން މިހާރު ކުރިއަށްދަނީ މަގުގައި ހުރި ގާތަކާއި ދުވާރު ނެގުމުގެ މަސައްކަތެވެ. އަދި މަގު ހެދުމުގެ މައިގަނޑު މަސައްކަތްތައް މި ހަފްތާގެ ތެރޭގައި ފެށިގެންދާނެ ކަމަށްވެސް އެ ކުންފުނިން ވިދާޅުވިއެވެ.

Ad by Hajj Corporation

އެމްޓީސީސީން ފާހަގަކުރި ގޮތުގައި މި މަޝްރޫޢުގެ ސަބަބުން މާލޭގައި ދިރިއުޅޭ ރައްޔިތުންނަށް އޮމާން، ފަސޭހަ މަގުތަކެއް ލިބި، ދަތުރުފަތުރު ކުރުމުގައި ބޮޑެތި ލުއިފަސޭހަތަކެއް ލިބިގެންދާނެއެވެ. މީގެ އިތުރުން މިއީ މާލެއަކީ އިތުރަށް ގުޅާލެވިފައިވާ އަދި ފަސޭހައިން ވާސިލުވެވޭނެ ސިޓީއަކަށް ހެދުމަށް އެޅިގެންދާ މުހިންމު ފިޔަވަޅެކެވެ.

ބޮޑުތަކުރުފާނު މަގު ތަރައްޤީ ކުރުމުގެ މަޝްރޫޢުގެ ފުރަތަމަ ފިޔަވަހީގެ ދަށުން ޖުމްހޫރީ މައިދާނުން ފެށިގެން ނޯތު ހާބަރާއި ހަމައަށް ވަނީ ތަރައްޤީކޮށްފައެވެ. އަދި ދެވަނަ ފިޔަވަހީގެ ދަށުން ހެންވޭރު ޓާމިނަލުން ފެށިގެން ޖުމްހޫރީ މައިދާނާ ހަމައަށް މަގު ފުޅާކޮށް ތަރައްޤީކޮށްފައިވާއިރު، ތިންވަނަ ފިޔަވަހީގެ ދަށުން ކުރިއަށްދާނީ މިހާރު މަގުގެ ނުހެދި އޮތް ބައިތައް ތަރައްޤީކުރުމުގެ މަސައްކަތެވެ.