މި އަހަރާ އަޅައިބަލާއިރު އަންނަ އަހަރު ރާއްޖޭގެ އިންފްލޭޝަން ރޭޓު ދަށްވެ، ޖީޑީޕީ 3 ޕަސަންޓުން ކުރިއަރާނެ ކަމަށް އޭޝިއަން ޑިވެލޮޕްމަންޓް ބޭންކް (އޭޑީބީ) އިން ލަފާކޮށްފިއެވެ.

އޭޑީބީން މިއަދު ނެރުނު އޭޝިއާ އަދި ޕެސިފިކް ސަރަހައްދުގެ އިގުތިސޯދީ އަންދާޒާ ރިޕޯޓުގައި ބަޔާންކޮށްފައިވާ ގޮތުގައި މި އަހަރު ރާއްޖޭގެ ޖީޑީޕީ ކުރިއަރާނެ ކަމަށް ލަފާކުރެވެނީ އެއް ޕަސެންޓުންނެވެ.

Ad by Hajj Corporation

ރިޕޯޓުގައި ފާހަގަކޮށްފައިވާ ގޮތުގައި މެދުއިރުމަތީގެ ހަމަނުޖެހުންތަކާ ގުޅިގެން ރާއްޖޭގެ ފަތުރުވެރިކަމަށް ވަނީ ހުރަސްތަކެއް ކުރިމަތިވެފައެވެ. އެގޮތުން މިދިޔަ އަހަރުގެ ފުރަތަމަ ހަ މަހާ އަޅައިބަލާއިރު މިއަހަރުގެ އެ މުއްދަތުގައި ޒިޔާރަތްކުރި ފަތުރުވެރިންގެ އަދަދު 5.7 ޕަސަންޓު ދަށަށް ގޮސްފައިވީ ނަމަވެސް، ފަތުރުވެރިން ކުރި ހޭދަ އިތުރުވުމުން މެއި މަހުގެ ނިޔަލަށް ދަތުރުފަތުރުން ލިބުނު އާމްދަނީ ވަނީ 1.9 ޕަސަންޓު ކުރިއަރާފައެވެ. އަދި ރިސޯޓުތަކުގެ އިންވެސްޓްމަންޓްތަކާއި ސަރުކާރުގެ ކެޕިޓަލް ހަރަދުތައް 12.9 ޕަސެންޓު އިތުރުވުމާ ގުޅިގެން އިމާރާތްކުރުމުގެ ސިނާއަތް ކުރިއަރާފައިވާ ކަމަށް ބަޔާންކޮށްފައިވެއެވެ. ނަމަވެސް، މަސްވެރިކަން ދަށްވުމާއި މޫސުމީ ބަދަލުތަކުގެ ސަބަބުން އަހަރުގެ ފުރަތަމަ ހަ މަހު މަސް ބޭރުކުރި މިންވަރު ވަނީ 49.7 ޕަސަންޓު ދަށަށް ގޮސްފައެވެ.

އޭޑީބީން ބުނެފައިވަނީ ރާއްޖޭގެ އިންފްލޭޝަން މި އަހަރު 2.2 ޕަސަންޓުގައި ހުރުމަށްފަހު އަންނަ އަހަރު 2.0 ޕަސަންޓަށް ދަށްވާނެ ކަމަށް ލަފާކުރެވޭ ކަމަށެވެ. އަދި ތެލާއި ކަރަންޓަށް ދޭ ބޮޑެތި ސަބްސިޑީތަކުގެ ސަބަބުން ތަކެތީގެ އަގު ކޮންޓްރޯލް ކުރެވުނު ނަމަވެސް، މީގެ ސަބަބުން ފިސްކަލް ޑެފިސިޓާއި ދައުލަތުގެ ދަރަނި އިތުރުވަމުންދާ ކަމަށް އިންޒާރު ދީފައިވެއެވެ. މި އަހަރު ފިސްކަލް ޑެފިސިޓް ހަ ޕަސެންޓުގައި ހުންނާނެ ކަމަށް ލަފާކުރާއިރު، އަންނަ އަހަރު މިއަދަދު 4.5 ޕަސެންޓަށް އަދި ކަރަންޓް އެކައުންޓް ޑެފިސިޓް 12.5 ޕަސެންޓަށް ކުޑަވާނެ ކަމަށް ވަނީ އަންދާޒާކޮށްފައެވެ.