އޭޝިއަން ޑިވެލޮޕްމެންޓް ބޭންކް (އޭޑީބީ) އިން ރާއްޖެއަށް ދިނުމަށް ހަމަޖެހިފައިވާ "އެނާޖީ ސެކިއުރިޓީ އެމަޖެންސީ އެސިސްޓެންޓް ޕްރޮޖެކްޓް" ގެ ދަށުން 50 މިލިއަން އެމެރިކާ ޑޮލަރުގެ ލޯނު އެހީގެ ރަސްމީ އެއްބަސްވުންތަކުގައި ދިވެހި ސަރުކާރާއި އޭޑީބީއާ ދެމެދު މިއަދު ސޮއިކޮށްފިއެވެ.

މި އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ ފިނޭންސް މިނިސްޓަރުހަސަން ޒަރީރު އެވެ. އޭޑީބީގެ ފަރާތުން ސޮއިކުރެއްވީ އެ ބޭންކުގެ ސައުތު އޭޝިއާ ޑިޕާޓްމަންޓުގެ ރީޖަނަލް ކޯޕަރޭޝަން އެންޑް އިންޓަގްރޭޝަން ޔުނިޓުގެ ރީޖަނަލް ހެޑް ޑރ. ތިއާމް ހީ ނިގް އެވެ.

Ad by Hajj Corporation

މި ޕްރޮޖެކްޓުގެ އެއްބަސްވުމުގައި ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) ގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު ޝިމާދު އިބްރާހީމް އެވެ.

ފިނޭންސް މިނިސްޓްރީން ހާމަކޮށްފައިވާ ގޮތުގައި، މި ލޯނު އެހީގެ ދަށުން ހިންގާ މަޝްރޫއަކީ މެދުއިރުމަތީގައި ހިނގަމުންދާ ހަނގުރާމައާ ގުޅިގެން ދުނިޔޭގެ ބާޒާރުގައި ހަކަތައިގެ އަގުތައް އުފުލެމުންދާތީ، އެކަމަށް އިޖާބަދިނުމުގައި ސަރުކާރަށް އެހީތެރިވުމުގެ ގޮތުން ކުރިއަށް ގެންދާ މުހިންމު މަޝްރޫއެކެވެ.

އޭޑީބީން ކުރިން ހާމަކޮށްފައިވާ ގޮތުގައި މި ލޯނު ދޫކުރުމުގެ މައިގަނޑު މަގުސަދަކީ ރާއްޖެއަށް ތެޔޮ އިމްޕޯޓް ކުރުމަށް އެހީތެރިވެދީ، ރައްޔިތުންނަށް ބޭނުންވާ ކަރަންޓާއި ފެނުގެ ރައްކާތެރިކަން މެދުކެނޑުމެއްނެތި ކަށަވަރުކޮށްދިނުމެވެ.

މި ފެސިލިޓީއަކީ މަލްޓިލެޓަރަލް ބޭންކުތަކުން ކޮންސެޝަނަލް ފައިނޭންސިން ހޯދުމަށް ސަރުކާރުން ކުރަމުންދާ މަސައްކަތުގެ ތެރެއިން ހަމަޖެހިފައިވާ ފައިނޭންސިންއެކެވެ. މިފަދަ ކޮންސެޝަނަލް ފެސިލިޓީތަކުގެ ސަބަބުން ސަރުކާރުގެ ޑެޓް ސަސްޓެއިނަބިލިޓީ ދެމެހެއްޓެނިވި މިންގަނޑެއްގައި ހިފެހެއްޓުމަށް އެހީތެރިވެދޭނެއެވެ.