ޑްރަގުގެ ފަރުވާއަށް އޮތް އެންމެ ބޮޑު އެއް ހުރަހަކީ ޖާގައިގެ މައްސަލަ ކަމަށާއި ކ. ހިންމަފުށީގައި އަޅާ އާ ޑްރަގް ރިހިބިލިޓޭޝަން ސެންޓަރާ އެކު ފަރުވާ ދިނުމަށް ފަސޭހަވާނެ ކަމަށް ހޯމް މިނިސްޓްރީގެ ސްޓޭޓް މިނިސްޓަރު އަދި ނޭޝަނަލް ޑްރަގް އޭޖެންސީ (އެންޑީއޭ) ޗެއާޕާސަން އަހުމަދު ސިއްދީގު ވިދާޅުވެއްޖެ އެވެ.

ކ. ހިންމަފުށީގައި 5 މިލިއަން ޑޮލަރު ހަރަދުކޮށްގެން 500 މީހުންނަށް އެއްފަހަރާ ފަރުވާދެވޭ ފެންވަރުގެ އާ ޑްރަގް ރިހިބިލިޓޭޝަން ސެންޓަރެއް އެޅުމުގެ ބިންގާ މިދިޔަ އަންގާރަ ދުވަހު ވަނީ އަޅާފައެވެ. މި މަޝްރޫޢަކީ ރާއްޖޭގައި މަސްތުވާތަކެތީގެ ފަރުވާދޭ މަރުކަޒުތަކުގެ ޖާގައިގެ ދަތިކަމަށް ހައްލެއް ހޯދުމަށް ސަރުކާރުން ފަށާފައިވާ މުހިންމު މަސައްކަތެކެވެ.

Ad by Hajj Corporation

 ސިއްދީގު ވިދާޅުވީ، ޑްރަގް ފަރުވާއަށް މިހާރު ދިމާވެފައިވާ އެންމެ ބޮޑު ހުރަހަކީ ޖާގައިގެ މައްސަލަ ކަމަށާއި، މި އާ އިމާރާތާއެކު އެ މައްސަލައަށް ދާއިމީ ހައްލެއް ލިބިގެންދާނެ ކަމަށެވެ. އަދި މިފަދަ އަމަލީ މަސައްކަތްތަކުން ސަރުކާރުގެ ނަތީޖާ ފެންނާނެ ކަމަށް އޭނާ ފާހަގަކުރެއްވިއެވެ.

އެންކޯ ހޯލްޑިންގްސްއާ ހަވާލުކޮށްގެން ކުރިއަށްގެންދާ މި މަޝްރޫއުގެ ދަށުން، ހިންމަފުށީ ރައްޔިތުންނަށްވެސް ހިދުމަތް ލިބޭނެހެން ސިއްހީ ފެސިލިޓީއަކާއި، ސްކިލް ޑިވެލޮޕްމެންޓް އަދި ކައުންސިލިންގްގެ ހިދުމަތްތައް ވެސް އެ ތަނުގައި ގާއިމުކުރުމަށް ވަނީ ނިންމާފަ އެވެ.

މިހާރު ހުރި އިމާރާތަކީ ބާވެ ހަލާކުވުމުގެ ސަބަބުން މަދު ބަޔަކަށް ނޫނީ ފަރުވާ ނުދެވޭ ތަނަކަށް ވީ ނަމަވެސް، އާ އިމާރާތުގެ މަސައްކަތް ނިމުމުން ފަރުވާ ބޭނުންވާ ފަރާތްތަކަށް ފުރިހަމަ އަދި އެންމެ އެކަށީގެންވާ ފަރުވާ ލިބި، ހެޔޮލަފާ ދަރިންތަކެއްގެ ގޮތުގައި މުޖުތަމައަށް ނުކުތުމުގެ ފުރުސަތު ފަހިވެގެންދާނެ ކަމަށް ވެސް ސިއްދީގު ފާހަގަ ކުރެއްވެވި އެވެ.