ފުލުހަކަށް ހަމަލާދިނުމުގެ ކުށުގައި އަންހެނަކު ހައްޔަރުކޮށްފި އެވެ.

މިމައްސަލައިގައި ހައްޔަރުކޮށްފައިވަނީ ގދ. ވާދޫއަށް ނިސްބަތްވާ އުމުރުން 46 އަހަރުގެ އަންހެނެކެވެ.

އޭނާގެ މައްޗަށް ތުހުމަތުކުރަނީ ފުލުހުންގެ ދައުރު އަދާކުރުމަށް ހުރަސްއަޅައި މާރާމާރީ ހިންގި ކަމަށެވެ.

އަންހެން މީހާގެ ބަންދާ މެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން އޭނާގެ ބަންދަށް ކޯޓުން ވަނީ 15 ދުވަސް ދީފަ އެވެ. އެހެންކަމުން އޭނާ ބަންދުން ދޫވާނީ އަންނަ މަހުގެ 11 ވަނަ ދުވަހު އެވެ.

ކޯޓު އަމުރުގައިވާ ގޮތުން އަންހެން މީހާގެ ބަންދަށް ކޯޓުން މުއްދަތު ޖެހީ އޭނާ ދޫކޮށްލައިފިނަމަ މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެ ކަމަށް ފެންނާތީ އެވެ.

ބަންދު މަޖިލީހުގައި އަންހެން މީހާ ވަނީ އޭނާއަކީ ނަފްސާނީ ބައްޔަށް ފަރުވާކުރަމުންދާ މީހެއް ކަމަށް ބުނެފަ އެވެ. އެކަމަކު ހެކީގެ ގޮތުގައި ކޯޓަށް އެފަދަ އެއްވެސް ލިޔުމެއް ހުށަހަޅާފައި ނެތް ކަމަށް ކޯޓުން ކަނޑައަޅާފައިވެ އެވެ.

Ad by Hajj Corporation