ވާލްޑް ޓްރެވަލް އެވޯޑްސް 2026 ގައި އިންޑިއަން އޯޝަން ކެޓަގަރީގެ ދަށުން ރާއްޖެއިން 26 އެވޯޑެއް ހާސިލުކޮށްފި އެވެ.

މި އެވޯޑްތައް ލިބުނު ދާއިރާތަކުގެ ތެރޭގައި ރިޒޯޓުތަކާއި، ހޮޓާތަކާއި، އެއާލައިންތަކާއި، އެއާޕޯޓުތަކާއި އަދި ޓުއާ އޮޕަރޭޓަރުންނާއި، ޓްރެވަލް އެޖެންސީތަކުގެ އިތުރުން ފަތުރުވެރިކަމުގެ އެކި ތަޖުރިބާތަކުގެ ދާއިރާތައް ހިމެނެއެވެ.

Ad by Hajj Corporation

މި އަހަރު ބޭއްވި 33 ވަނަ ވާލްޑް ޓްރެވަލް އެވޯޑްސްގައި އިޢުލާނުކުރި އިންޑިއަން އޯޝަންގެ 53 ކެޓަގަރީގެ ތެރެއިން، އެންމެ މަޤްބޫލު މަންޒިލެއްގެ ގޮތުގައާއި މުއައްސަސާތަކުގެ ފެންވަރުގައި ރާއްޖެއަށް ފަސް އެވޯޑު ލިބުނުއިރު، ދެން ހިމެނޭ 26 އެވޯޑު ކާމިޔާބުކުރީ ރާއްޖޭގެ ފަތުރުވެރިކަމާއި ވައިގެ ދަތުރުފަތުރުގެ ދާއިރާގެ ވިޔަފާރިތަކުންނެވެ.

މަޤްބޫލް މަންޒިލެއްގެ ގޮތުގައާއި މުއައްސަސާތަކުގެ ފެންވަރުގައި ރާއްޖެއަށް ލިބުނު ފަސް އެވޯޑު ނުހިމަނައި، އިންޑިއަން އޯޝަން ކެޓަގަރީގެ ބާކީ އޮތް 48 އެވޯޑުގެ ތެރެއިން 26 އެވޯޑު ހާސިލުކުރީ ރާއްޖޭގެ އެކި އިންޑަސްޓްރީގެ ފަރާތްތަކުންނެވެ. އަދި އެހެން ހުރިހާ މަންޒިލްތަކާއި ޖަމްޢިއްޔާތައް އެއްކޮށް ހޯދާފައިވަނީ ޖުމްލަ 22 އެވޯޑެވެ.

މި ސަރަޙައްދުގެ އެންމެ މަތީ ފަންތީގެ މެހެމާންދާރީގެ ކެޓަގަރީތަކުގައި ރާއްޖެ ވަކިން ޚާއްޞަކޮށް ފާހަގަވި އެވެ. އެގޮތުން ކޮންރެޑް މޯލްޑިވްސް ރަންގަލި އައިލެންޑް ވަނީ 'އިންޑިއަން އޯޝަންސް ލީޑިންގ ހަނީމޫން ރިޒޯޓް' އަދި 'ލީޑިންގ ހޮޓެލް' ގެ އިތުރުން 'އިންޑިއަން އޯޝަންސް ރެސްޕޮންސިބަލް ޓޫރިޒަމް އެވޯޑް' ވެސް ހާސިލުކޮށްފައެވެ. އަދި ވޯ އިތާފުށި 'އިންޑިއަން އޯޝަންސް ލީޑިންގ ލަގްޒަރީ އައިލެންޑް ރިޒޯޓް' ގެ މަޤާމު ހޯދިއިރު، ދަ ސެންޓް ރެޖިސް މޯލްޑިވްސް ވޮއްމުލި ރިޒޯޓް ހޮވުނީ 'އިންޑިއަން އޯޝަންސް ލީޑިންގ ލަގްޒަރީ ރިޒޯޓް' ގެ ގޮތުގައެވެ.

މި ކާމިޔާބީތައް އާ ތަރައްގީތަކަށާއި ތަފާތު ރިޒޯޓު ތަޖުރިބާތަކަށް ވެސް ވަނީ ފުޅާވެގެން ގޮސްފައެވެ. މީގެ އިތުރުން ރާއްޖޭގެ ގައުމީ އެއަރލައިން،  މޯލްޑިވިއަން އިން ވަނީ އިންޑިއަން އޯޝަންސް ލީޑިންގ އެއަރލައިން – އިކޮނޮމީ ކްލާސް އަދި އިންޑިއަން އޯޝަންސް ލީޑިންގ އެއަރލައިން ބްރޭންޑް، މި ދެ އެވޯޑުވެސް ކާމިޔާބުކޮށްފައެވެ. އަދި ވެލާނާ އިންޓަނޭޝަނަލް އެއާޕޯޓުގައި ހުންނަ މަންތާ އެއަރ ސަފަޔަރ ލައުންޖް ވަނީ އިންޑިއަން އޯޝަންސް ލީޑިންގ އެއަރލައިން ލައުންޖުގެ ގޮތުގައި ވަނީ ހޮވިފަ އެވެ.

ވެލާނާ އިންޓަނޭޝަނަލް އެއާޕޯޓުން އިންޑިއަން އޯޝަންސް ލީޑިންގ އެއާޕޯޓުގެ އެވޯޑު ހޯދިއިރު، ހުޅުލެ އައިލެންޑް ހޮޓެލް ވަނީ ލީޑިންގ އެއާޕޯޓް ހޮޓެލްގެ އެވޯޑު ކާމިޔާބުކޮށްފައެވެ. އަދި ޓްރާންސް މޯލްޑިވިއަން އެއާވޭސް (ޓީއެމްއޭ) ހޮވިފައިވަނީ އިންޑިއަން އޯޝަންސް ލީޑިންގ ސީޕްލޭން އޮޕަރޭޓަރުގެ ގޮތުގައެވެ.

ދިވެހި ޓްރެވަލް ވިޔަފާރިތަކުން ވެސް ވަނީ ސަރަހައްދީ ފެންވަރުގައި ފާހަގަކޮށްލެވޭ ކާމިޔާބީތަކެއް ހޯދާފައެވެ. މިގޮތުން، 'ގެޓް އިންޓު މޯލްޑިވްސް ޓްރެވަލްސް' އިންޑިއަން އޯޝަންސް ލީޑިންގ ލަގްޒަރީ ޓުއަރ އޮޕަރޭޓަރުގެ ގޮތުގައި ހޮވުނުއިރު، 'ސިމްޕްލީ މޯލްޑިވްސް' ވަނީ އިންޑިއަން އޯޝަންސް ލީޑިންގ ޓްރެވަލް އެޖެންސީގެ އެވޯޑު ކާމިޔާބުކޮށްފައެވެ.

ހުރިހާ އެވޯޑުތަކެއް އެއްކޮށް 31 އެވޯޑު ލިބުނުއިރު، ދިވެހިރާއްޖެއިން 26 ޓްރޭޑް އަދި އިންޑަސްޓްރީ އެވޯޑު ހޯދާފައިވުމުން، ވޯލްޑް ޓްރެވަލް އެވޯޑްސް 2026 ގެ ނަތީޖާއިން ސާބިތުކޮށްދެނީ ރާއްޖޭގެ ސަރަހައްދީ ވަރުގަދަކަމަކީ ހަމައެކަނި ފަތުރުވެރިކަމުގެ މަންޒިލެއްގެ ބްރޭންޑަކަށްވުރެ މާފުޅާ ކަމެއްގެ ގޮތުގަ އެވެ.

ވައިގެ ދަތުރުފަތުރާއި ޓްރެވަލް ޚިދުމަތްތަކުން ފެށިގެން، ޕްރައިވެޓް އައިލެންޑްތަކާއި، ލަގްޒަރީ ރިޒޯޓުތަކާއި، ދެމެހެއްޓެނިވިކަމާއި އަދި ޚާއްސަ ފަތުރުވެރިކަމުގެ ތަޖުރިބާތަކާ ހަމައަށް، ދިވެހިރާއްޖޭގެ ފަތުރުވެރިކަމުގެ ދާއިރާ ވެގެންގޮސްފައިވަނީ 2026 ވަނަ އަހަރު އިންޑިއާ ކަނޑުގެ ކެޓަގަރީތަކުން އެންމެ ފުޅާ ދާއިރާއެއްގައި ބަލައިގަތް ފަތުރުވެރިކަމުގެ ދާއިރާއަށެވެ.