މަގުމަތީގެ އަމާންކަމާއި ރައްކާތެރިކަން ދެމެހެއްޓުމަށްޓަކައި، ޓްރެފިކް ގަވާއިދުތަކަށް ބޯނުލަނބާ ފަރާތްތަކާމެދު އެންމެ ހަރުކަށި ފިޔަވަޅު އެޅުމަށް ކޮމިޝަނަރ އޮފް ޕޮލިސް އަޙްމަދު މުޙައްމަދު އަންގަވައިފިއެވެ.

ސީޕީ މިރޭ އާންމުކުރެއްވި ހާއްސަ މެސެޖެއްގައި ވިދާޅުވީ، މަގުމަތީގެ ޓްރެފިކް އާންމު އުސޫލުތަކަށާއި އަދަބުތަކަށް ބޯނުލަނބާ މަދު ބައެއްގެ ސަބަބުން، ގިނަ ބައެއްގެ ހައްގުތައް ގެއްލި، ނުރައްކާތެރި އެކިއެކި ހާދިސާތައް ތަކުރާރުކޮށް ހިނގަމުންދާ ކަމަށެވެ. އެހެންކަމުން، މިފަދަ އުސޫލުތަކާއި ޓްރެފިކް ގާނޫނާއި ގަވާއިދުތަކަށް ތަކުރާރުކޮށް ހިލާފުވާ ފަރާތްތަކާމެދު ދިވެހި ފުލުހުންގެ ޚިދުމަތުން ހާއްސަ ފިޔަވަޅުތަކެއް އަޅަމުން ގެންދާނެ ކަމަށް ވަނީ ހާމަކުރައްވާފައެވެ.

Ad by Hajj Corporation

މި ފިޔަވަޅުތަކުގެ މައިގަނޑު މަގުސަދަކީ މަގުތަކަކީ އެންމެހާ ރައްޔިތުންނަށް ރައްކާތެރި އަދި އަމާން ތަނެއްގެ ގޮތުގައި ބޭއްވުމާއި، މަދު ބައެއްގެ ސަބަބުން ތަކުރާރުކޮށް ހިނގާ ނުރައްކާތެރި ހާދިސާތައް ހުއްޓުވުމަށް އެޅެންހުރި އެންމެ ހަރުކަށި ފިޔަވަޅުތައް އެޅުން ކަމަށް ސީޕީ ފާހަގަކުރެއްވިއެވެ.

މީގެއިތުރުން، ކަމާގުޅުންހުރި އެންމެހާ މުއައްސަސާތަކާ ގުޅިގެން މި ފިޔަވަޅުތައް އެންމެ މަތީ ދަރަޖައެއްގައި އަޅަމުން ގެންދިއުމަށް ފުލުހުންގެ ކަމާބެހޭ އެންމެހާ ބަހާތަކަށް މިހާރު އަންގަވާފައިވާ ކަމަށްވެސް ވިދާޅުވިއެވެ. މި ފިޔަވަޅުތައް ގްރޭޓަރ މާލެ އޭރިޔާގެ އިތުރުން އަތޮޅުތެރޭގެ ރަށްރަށުގައިވެސް ވަރުގަދައަށް ތަންފީޒުކުރަމުންދާނެއެވެ.

ކޮމިޝަނަރ އޮފް ޕޮލިސް ވަނީ މަގުމަތީގެ އަމާންކަން ގާއިމުކުރުމަށް ފުލުހުން ކުރަމުންދާ މަސައްކަތްތަކުގައި އެންމެހާ ފަރާތްތަކުގެ އެހީތެރިކަމާއި އެއްބާރުލުން ދެއްވުމަށް އިލްތިމާސްކުރައްވާފައެވެ.