ޔުއެފާ ނޭޝަންސް ލީގުގައި ޒުވާން ތަރި ލަމީން ޔަމާލް ދެ ލަނޑު ޖަހައި އެއް ލަނޑު ޖެހުމަށް އެހީތެރިވެދިން މެޗުގައި، 1-4 ގެ ނަތީޖާއަކުން ކްރޮއޭޝިއާ ބަލިކޮށް ސްޕެއިނުން ބަލިނުވެ ދަމަހައްޓަމުން އަންނަ ރެކޯޑު 40 މެޗަށް އިތުރުކޮށްފިއެވެ. އެސްޓާޑިއޯ ރަމޯން ސަންޗޭޒް ޕިޒްހުއާންގައި ކުޅުނު މި މެޗަކީ ވޯލްޑް ކަޕް ކާމިޔާބުކުރުމަށްފަހު އަމިއްލަ ދަނޑުގައި ސްޕެއިން ކުޅުނު ފުރަތަމަ މެޗެވެ. މެޗު ފެށުމުގެ ކުރިން ރޮޑްރީ ވަނީ އެ ޓްރޮފީ ދަނޑުގައި ދައްކާލާފައެވެ.

މެޗު ފެށިގެން ދެވަނަ މިނެޓުގައި އެލެކްސް ބައެނާ ތަނަވަސްކޮށްދިން ފުރުސަތަކުން ޔަމާލް ވަނީ ސްޕެއިނަށް ލީޑު ނަގައިދީފައެވެ. ނަމަވެސް، މެޗުގެ ބައިގަޑިއިރު ހަމަވާން އުޅެނިކޮށް އިވާން ޕެރިސިޗް ނަގައިދިން ހުރަހަކުން ޑިއޯން ބެލްޖޯ ވަނީ ބޮލުން ގޯލުގެ ތެރެއަށް ބޯޅަ ފޮނުވާލައި ކްރޮއޭޝިއާއަށް ނަތީޖާ ހަމަހަމަކޮށްދީފައެވެ. އޭގެ ތިން މިނެޓު ފަހުން، ޔަމާލް ނެގި ހުރަހަކުން މާކް ޕުބިލް ވަނީ ސްޕެއިނަށް އަލުން ލީޑު ހޯދައިދީފައެވެ.

Ad by Hajj Corporation

ދެވަނަ ހާފުގައި ސްޕެއިނުން ވަނީ އެޓޭކްތައް ވަރުގަދަކޮށްފައެވެ. އެގޮތުން މެޗުގެ 63 ވަނަ މިނެޓުގައި ޕެޑްރީ ދިން ޕާހަކުން ޔަމާލް ވަނީ އޭނާގެ ދެވަނަ ލަނޑު ކާމިޔާބުކޮށް ސްޕެއިންގެ ލީޑު ފުޅާކޮށްދީފައެވެ. އަދި މެޗުގެ 89 ވަނަ މިނެޓުގައި ނިކޯ ވިލިއަމްސް ވަނީ ސްޕެއިންގެ ހަތަރުވަނަ ލަނޑު ޖަހައި ފުރިހަމަ މޮޅެއް ކަށަވަރުކޮށްދީފައެވެ.

މި މެޗުގައިވެސް ތަފާތު މޮޅު ކުޅުމެއް ދެއްކި ޔަމާލް ވަނީ ދެ ލަނޑާއި އެސިސްޓެއް ހެދުމުގެ އިތުރުން ނުރައްކާތެރި ދެ ފުރުސަތު ތަނަވަސްކޮށްދީ، ނުވަ ޑްރިބްލް އަދި ފައިނަލް ތާޑަށް 24 ޕާސް ފޮނުވާލާފައެވެ. މިއީ 2004 ވަނަ އަހަރުގެ ފަހުން ސްޕެއިނުން ޖެހިޖެހިގެން ދެ މެޗުގެ ފުރަތަމަ ދެ މިނެޓުގެ ތެރޭގައި ލަނޑު ޖެހި ފުރަތަމަ ފަހަރެވެ.

މި ނަތީޖާއާއެކު، ލުއިސް ޑި ލަ ފުއެންޓޭގެ އިރުޝާދުގެ ދަށުން ކުޅޭ ސްޕެއިން ވަނީ އެންމެ ފަހުން ކުޅުނު 40 މެޗުން ބަލިނުވެ (31 މޮޅު، 9 އެއްވަރު)، ޔޫރަޕްގެ ޤައުމަކުން ހޯދި އެންމެ ދިގު ރެކޯޑު ދަމަހައްޓާފައެވެ. އަދި ޖެހިޖެހިގެން ނުވަ މެޗުން މޮޅުވެ، ނޭޝަންސް ލީގުގެ ގްރޫޕް އޭ3 ގެ އެއްވަނައިގައި ސްޕެއިން އޮތީ ކުޅުނު ދެ މެޗުން ހަ ޕޮއިންޓް ހޯދައިގެންނެވެ.