ރެއާލް މެޑްރިޑްގެ ރައީސް ފްލޮރެންޓީނޯ ޕެރޭޒާ ދެކޮޅަށް އެފްސީ ބާސެލޯނާއިން ރަސްމީކޮށް ކޯޓަށް މައްސަލަ ހުށަހަޅައިފި ކަމަށް ސްޕެއިންގެ މީޑިއާތަކުން ރިޕޯޓްކޮށްފިއެވެ. ބާސާއިން މި ފިޔަވަޅު އަޅާފައިވަނީ އެ ކްލަބުގެ ތާރީޚާއި ކަރާމާތަށް އުނިކަން އަންނަ ގޮތަށް ޕެރޭޒް ދެއްކެވި ވާހަކަތަކާ ގުޅިގެންނެވެ.

މި މައްސަލަ އުފެދިފައިވަނީ ފާއިތުވި މެއި މަހު ބޭއްވި ނޫސްވެރިންގެ ބައްދަލުވުމެއްގައި، ކުރިއަށްދާ "ނެގްރެއިރާ ކޭސް" އާ ގުޅޭގޮތުން ޕެރޭޒް ދެއްކެވި ވާހަކަތަކަކާ ގުޅިގެންނެވެ. ޕެރޭޒް ވިދާޅުވެފައިވަނީ ސްޕެއިންގެ ރެފްރީންގެ ކޮރަޕްޝަނަކީ ނިޒާމީ ގޮތެއްގައި ހިންގާފައިވާ ކަމެއް ކަމަށާއި، މިއީ ދުނިޔޭގެ ފުޓުބޯޅަ ތާރީޚުގައި ވެސް ހިނގި އެންމެ ބޮޑު ސްކޭންޑަލް ކަމަށެވެ. އަދި ބާސެލޯނާއަށް ލިބުނު ފަހި ފުރުސަތުތަކުގެ ސަބަބުން ރެއާލް މެޑްރިޑަށް ލަލީގާގެ ހަތް ތަށި ގެއްލިފައިވާ ކަމަށް ވެސް އޭނާ ތުހުމަތު ކުރެއްވިއެވެ.
ބާސެލޯނާއިން އެކުލަބުގެ އެންމެ ކާމިޔާބު ދުވަސްވަރު، 2001 އިން 2018 ވަނަ އަހަރާއި ދެމެދު ރެފްރީންގެ ކަންކަން ބަލަހަށްޓާ ކޮމިޓީގެ ވައިސް ޗެއާމަންއަށް ގޮތްނޭނގޭ އެތައް މިލިޔަން ޑޮލަރުތަކެއްގެ މައްސަލަ މިހާރު ދަނީ ކޯޓުގައި ހިނގަމުންނެވެ. ޕެރޭޒްގެ ވާހަކަތަކުގައި ބާސެލޯނާއަށް ރައްދުދެމުން ބުނެފައިވަނީ ބާސެލޯނާއިން އެކުލަބުން ހޯދާފައިވާ ކާމިޔާބީތައް ހޯދުމުގައި ރެފްރީންނަށް ރިޝްވަތު ދީފައިވާކަމަށެވެ.

Ad by Hajj Corporation

ޕެރޭޒްގެ މި ތުހުމަތުތަކާ ގުޅިގެން ބާސެލޯނާއިން ވަނީ ސްޕެއިންގެ ޕީނަލް ކޯޑުގެ ދަށުން އަބުރާ ބެހުމުގެ ޖިނާއީ ދައުވާ ކުރުމުގެ ކުރިން ބާއްވަން ޖެހޭ ރަސްމީ ސުލްހައިގެ އަޑުއެހުމަކަށް ކޯޓުގައި އެދިފައެވެ. ބާސެލޯނާގެ ވައިސް ޕްރެޒިޑެންޓް ރަފައެލް ޔޫސްތޭ ވަނީ ޕެރޭޒްގެ ވާހަކަތަކަކީ ލަދުވެތި ވާހަކަތަކެއް ކަމަށް ސިފަކުރައްވައި، މިއީ ބާސެލޯނާގެ ކާމިޔާބީތައް ހުއްޓުވުމަށް ގަސްތުގައި ދައްކާފައިވާ ދޮގު ވާހަކަތަކެއް ކަމަށް ތުހުމަތު ކުރައްވާފައެވެ.

ކޯޓުން މިހާރު ވަނީ ދެ ފަރާތް ވެސް ހާޒިރުވާން ޖެހޭ ސުލްހައިގެ އަޑުއެހުމެއް އަންނަ ނޮވެމްބަރު މަހުގެ 25 ވަނަ ދުވަހުގެ ހެނދުނު 9:40 އަށް މެޑްރިޑްގެ ކޯޓުގައި ތާވަލުކޮށްފައެވެ. މި އަޑުއެހުމުގައި ބާސެލޯނާއިން އެދޭނީ ޕެރޭޒް ދެއްކެވި ވާހަކަތައް ރަސްމީކޮށް އަނބުރާ ގެންދިއުމަށެވެ. އަދި ޕެރޭޒް އަޑުއެހުމަށް ހާޒިރުނުވެއްޖެނަމަ ނުވަތަ ވާހަކަތައް އަނބުރާ ނުގެންގޮސްފިނަމަ، ފަސްޖެހުމެއް ނެތި ޖިނާއީ ދައުވާ ރަސްމީކޮށް ކުރިއަށް ގެންދާނެ ކަމަށް ބާސެލޯނާއިން ވަނީ ބުނެފައެވެ.